Dy burra australianë pas një shkëmbim zjarri që la gjashtë të vdekur ishin “të fiksuar” me armët në rininë e tyre, thotë babai i tyre.
Nathaniel dhe Gareth Train, së bashku me gruan e Gareth, Stacey, u vranë nga policia të hënën pasi qëlluan dy oficerë policie dhe një fqinj.
Të enjten ministrja e Punëve të Brendshme e Australisë Clare O’Neil tha se radikalizmi ka të ngjarë të ketë luajtur një rol.
“Radikalizmi nuk është i ri. Por… teoritë e konspiracionit dhe dezinformimi – probleme të vjetra sa koha – po shndërrohen nga teknologjia në akte të tmerrshme dhune. Ata po paraqesin një lloj të ri kërcënimi për sigurinë tonë kombëtare”, i tha ajo parlamentit.
Policia ka thënë se treshja përdori “shumë armë”, por ende nuk ka zbuluar se çfarë ishte lloji apo motivi për sulmin.
58-vjeçari Alan Dare, fqinji i tyre u vra po ashtu nga të dyshuarit.
Disa media raportuan se Gareth Train duket se ka kontribuar shpesh në forume në internet që promovojnë teori konspirative. Në postimet ai kishte shprehur një mosbesim ndaj policisë dhe gabimisht pretendonte se të shtënat masive më vdekjeprurëse në vend ishin një dredhi e qeverisë për të çarmatosur australianët.
Duke folur për herë të parë që nga të shtënat, Ronald Train tha se djemtë e tij nuk ishin “përbindësha” por kishin “humbur plotësisht rrugën e tyre në jetë” qëkur u ndanë nga familja e tyre 20 vjet më parë.
Në një intervistë ekskluzive me programin televiziv lokal A Current Affair, Train tha se dyshja kishin treguar prej kohësh një interes për armët.
“Gareth në veçanti ishte i fiksuar… Nathaniel në një shkallë më të vogël”, tha ai.
Ai e përshkroi Gareth-in – më të madhin nga dy vëllezërit – si një fëmijë “të vështirë” që ishte “shumë i paqëndrueshëm dhe shumë kontrollues”, por tha se nuk mund ta kuptonte se si djemtë e tij ishin përfshirë në një akt të tillë të tmerrshëm, shkruan BBC, përcjell Klankosova.tv
“Unë thjesht nuk mund ta kuptoja se si mund të kishte ndodhur diçka e tillë me dy fëmijë që ishin rritur … me besime të caktuara, besime të krishtera”, tha Train.
Të dy oficerët e vrarë ishin relativisht të rinj në këtë punë – Rachel McCrow, 29 vjeç dhe Matthew Arnold, 26 vjeç.
