Ambasadori polak në NATO tha se "përgjegjësia përfundimtare është e Rusisë", pas raketës vdekjeprurëse që ra në territorin polak të martën që la dy persona të vdekur.
Duke folur për CNN, ambasadori Tomasz Szatkowski tha se incidenti nuk do të kishte ndodhur nëse Rusia nuk do të sulmonte Ukrainën dhe do të përfshihej në krime lufte duke sulmuar infrastrukturën civile, transmeton "Bota sot".
"Përgjegjësia përfundimtare i takon Rusisë," tha Szatkowski.
I pyetur se si po ndihen polakët pas incidentit, Szatkowski tha se "një nivel i caktuar frike është i kuptueshëm", duke shtuar se autoritetet po bëjnë shumë për të qetësuar popullatën.
Më mesnatë, ambasadori rus në OKB Vasily Nebenzya hodhi poshtë këto pretendime.
"Ne kemi kohë që nuk jemi më të befasuar nga përpjekjet tuaja, në çdo rrethanë, pavarësisht faktit apo arsyes së shëndoshë, për të fajësuar Rusinë për gjithçka," tha Nebenzya gjatë takimit të Këshillit të Sigurimit të OKB-së në Nju Jork.
“Sot, përkundër provave të qarta të provokimit ukrainas-polake, shumë përfaqësues të vendeve perëndimore kanë deklaruar se edhe nëse raketat janë lëshuar nga Ukraina, është ende Rusia ajo që është fajtore për shkatërrimin e infrastrukturës kritike”, shtoi Nebenzya.
Pak më shumë kontekst: Udhëheqësit e Polonisë dhe NATO-s thanë se raketa ka të ngjarë të ishte lëshuar nga forcat ukrainase që mbronin vendin e tyre kundër një breshëri sulmesh ruse dhe se incidenti dukej të ishte një aksident.
Hetimi i Polonisë për incidentin vazhdon.
Kjo është hera e parë që një vend i NATO-s goditet drejtpërdrejt gjatë konfliktit. Kreu i NATO-s Jens Stoltenberg tha gjithashtu se Rusia mban "përgjegjësinë përfundimtare" për incidentin, "pasi ajo vazhdon luftën e saj të paligjshme kundër Ukrainës".
