Ekipi i kompanisë së pasurive të paluajtshme në Dubai, Mira Estate ka "miliona" arsye për të festuar.
Tregu i pasurive të paluajtshme luksoze regjistroi një rritje 100% nga viti në vit në shitjet ndaj oligarkëve nga Rusia dhe vendet e ish-BRSS në gjysmën e parë të 2022.
Shitjet e pronave nga Mira Estate, e specializuar në këtë klientelë, u dyfishuan, me fitime prej 2 miliardë dirhemë (500 milionë dollarë), sipas shifrave zyrtare të kompanisë.
Në një klub “luksoz” në Dubai, agjentët rusë të një kompanie tjetër festuan me shampanja dhe pije të shtrenjta, pas gjashtë muajsh rekord. Një ndërmjetës kishte 4 milionë dirhemë (1 milion dollarë) komisione në vetëm tre muaj.
Ish-pronari i Chelsea FC, Roman Abramovich dhe një bashkëpunëtor i njohur i presidentit rus Vladimir Putin, raportohet se tashmë po mendojne blerjen e një prone në zonën e Palm Jumeirah (foto), arkipelagun e njohur artificial në formë palme.
Avioni privat i miliarderit, me vlerë 350 milionë dollarë, mbetet i konfiskuar në një aeroport të Emirateve të Bashkuara Arabe pas një vendimi të SHBA.
Fluksi i blerësve nga Rusia dhe vendet e Komonuelthit të Shteteve të Pavarura (CIS) , një grup prej 9 ish-vendesh të ish-BRSS, i kanë dhënë një nxitje dramatike sektorit të pasurive të paluajtshme të Emirateve të Bashkuara Arabe që nga fillimi i luftës në Ukrainë dhe sanksione kundër Rusisë.
Edhe pse shumë vende kanë vendosur sanksione dhe kanë sekuestruar asetet e oligarkëve miqësorë të Putinit, Emiratet e Bashkuara Arabe mbeten "të hapura për biznes".
"Lufta në Ukrainë dhe ndikimi i sanksioneve kanë çuar oligarkët e pasur rusë dhe të CIS në Dubai," tha CEO i Mira Estate Tamara Getigezheva , duke shtuar se "këta miliarderë po zgjedhin Emiratet e Bashkuara Arabe dhe po rrisin kërkesën për pasuri të paluajtshme luksoze".
Duke u rikuperuar nga rënia e fundit e kërkesës gjatë pandemisë, distrikti luksoz i Dubait po regjistron rritje të qëndrueshme pasi ekonomia "u hap" dhe masat për të luftuar koronavirusin u lehtësuan.
Ndërkohë, Emiratet e Bashkuara Arabe zgjeruan programin e vizave për banorët dhe punëtorët afatgjatë, ndërsa nënshkroi një marrëveshje historike me Izraelin dhe shfuqizoi disa ligje fetare dhe sociale.
Zgjedhja për neutralitetin gjeopolitik në një kohë kur shumica e ekonomive të zhvilluara po mbyllin dyert për Rusinë pas pushtimit të Ukrainës, ka bërë që Emiratet e Bashkuara Arabe, të cilat tashmë kishin një reputacion si një parajsë fiskale dhe sekrete të përfitojnë mjaft prej tyre.
