Një mjek izraelit tha se dy të burgosurve palestinezë nga Rripi i Gazës iu janë prerë këmbët për shkak të lëndimeve të marra nga prangat gjatë ndalimit të tyre. Mjeku në spitalin fushor të ngritur në kampin e paraburgimit Sde Teiman në shkretëtirën Negev, tha se të burgosurit palestinezë përballen me kushte të mjerueshme dhe shkelje të të drejtave të tyre.
“Vetëm këtë javë, dy të burgosurve iu prenë këmbët për shkak të lëndimeve nga hekurat e këmbëve, që për fat të keq është një ngjarje rutinë”, tha ai në një letër drejtuar ministrave të Mbrojtjes dhe Shëndetësisë dhe Prokurorit të Përgjithshëm, të cituar nga e përditshmja izraelite Haaretz. Sipas mjekut izraelit, të burgosurit palestinezë në objekt i kanë sytë e lidhur, ushqehen me kashtë, ndërsa nevojën e kryejnë me pelena.
Ai theksoi se të gjithë pacientët palestinezë në spitalin fushor janë të prangosur nga të katër gjymtyrët.
“Që nga ditët e para të funksionimit të institucionit mjekësor e deri më sot jam përballur me dilema të rënda etike”, tha doktori, duke shtuar:
“Për më tepër, unë po shkruaj këtë letër për t’ju paralajmëruar se operacionet e objekteve nuk përputhen me një seksion të vetëm nga ato që kanë të bëjnë me shëndetin në Ligjin për Burgosjen e Luftëtarëve të Paligjshëm”.
Mjeku tha se gjysma e pacientëve palestinezë u transferuan në spital për shkak të lëndimeve të shkaktuara nga hekurat e këmbëve gjatë ndalimit.
Hekurat e këmbëve, tha mjeku, shkaktojnë lëndime të rënda që “kërkojnë ndërhyrje të përsëritura kirurgjikale”.
“Në këto kushte, në praktikë, edhe pacientët e rinj dhe të shëndetshëm humbin peshë pas një ose dy javësh të shtrimit në spital”, tha mjeku.
Tre burime të tjera konfirmuan për Haaretz se një të burgosuri palestinez i është amputuar njëra dorë për shkak të lëndimeve të shkaktuara nga prangat plastike.
Një burim tha se shumë prej të arrestuarve morën prerje dhe më pas u infektuan për shkak të prangave të tyre.
Një zëdhënës i ushtrisë, nga ana e tij, pohoi se të arrestuarit prangosen “në përputhje me ligjin dhe sipas një përcaktimi individual të rrezikshmërisë së secilit të arrestuar, me synimin për të garantuar sigurinë e trupave dhe personelit mjekësor”.
Ai tha se ushtria ndryshoi llojin e hekurave të këmbëve të përdorura në objekt për shkak të lëndimeve të shkaktuara tek të arrestuarit.
“Rojet sigurojnë që të ketë hapësirë të mjaftueshme midis hekurave të këmbëve dhe gjymtyrëve të të arrestuarve”, shtoi ai.
Sipas shifrave palestineze, më shumë se 9.100 palestinezë vlerësohet të mbahen nga Izraeli në burgjet e tij.
Nuk ka shifra specifike se sa banorë të Gazës u arrestuan gjatë ofensivës së vazhdueshme të Izraelit në Rripin e Gazës.
