Komiteti Ndërkombëtar i Kryqit të Kuq (KNKK) deklaron se përveç furnizimeve humanitare të nevojshme në Gaza, personeli mjekësor duhet të punojë me më pak presion.
“Ajo që nevojitet më së shumti tani është një rrjedhë e vazhdueshme e furnizimeve dhe ndihmave humanitare në Gaza,” tha Sarah Davies e KNKK-së për BBC Breakfast. Ajo thotë se nuk nevojiten vetëm furnizimet, “por personeli mjekësor dhe ekipet kirurgjikale që mund të fillojnë të lehtësojnë një pjesë të presionit”.
Pika kufitare midis Egjiptit dhe Gazës u hap dje për të lejuar kalimin e 20 kamionëve me ndihma – siç është rënë dakord nga Izraeli, por Davies tha se nevojitet sërish ndihmë.
“Kjo duhet të mbahet, njerëzit nuk mund të mbijetojnë me 20 kamionë ndihma, është vërtet një situatë kaq e rëndë,” tha ajo. “Ne jemi në kontakt të rregullt me ekipet tona në terren dhe skenat që ata përshkruajnë janë të tmerrshme.”
