Një austriak i ekstremit të djathtë, i cili prezantohet si një “ekspert për Afganistanin” në forumet në internet është burgosur në vendin e Azisë Qendrore, tha të martën Ministria e Jashtme e Austrisë.
Të kontaktuar nga AFP, zyrtarët talebanë thanë se nuk kishin “asnjë informacion” për personin, sipas zëvendës zëdhënësit të ministrisë së jashtme afgane.
Të hënën, qeveria austriake konfirmoi në një deklaratë për shtyp “arrestimin e një shtetasi që kishte udhëtuar në Afganistan në maj, në kundërshtim me një paralajmërim dhjetëvjeçar nga autoritetet.”
Sipas gazetës Der Standard, i arrestuari është një ish-mësues 84-vjeçar dhe një neo-nazist i njohur. Personi dha një intervistë vjeshtën e kaluar, duke thënë se Afganistani “është përsëri i sigurt” .
Neo-nazisti i vjetër, sipas gazetës austriake, ka një prirje për udhëtime të rrezikshme.
Ai shkoi në Afganistan në vitet 1980, kur grupet guerile islamike po luftonin kundër trupave sovjetike. Ai vizitoi kreun e PKK Abdullah Ocalan, i pazakontë për të djathtën ekstreme. Disa vite më parë ai vizitoi luftëtarët e YPG-së që luftonin Shtetin Islamik në Sirinë veriore, madje tha se megjithëse anëtarët e YPG-së ishin të majtë “ata nuk kishin pothuajse asgjë të përbashkët me të majtët tanë”. Vitet e fundit ai vizitoi gjithashtu Ukrainën lindore.
Neo-nazistët austriakë bënë thirrje për lirimin e tij përmes Telegramit të shtunën, duke thënë se emri i 84-vjeçarit është Herbert Fritz. Ai ka rreth një muaj që ndodhet në paraburgim.
“Më 7 qershor, ai u vendos në izolim në një qeli në Kabul. Sistemi i drejtësisë talebane synon të vendosë mbi të akuzën absurde të spiunazhit brenda katër javëve të ardhshme”, thanë ata.
Ministria e Punëve të Jashtme austriake tha se ndihma konsullore për personat në rrezik në Afganistan është “e mundur në një masë shumë të kufizuar”.
