Gjykata e Lartë e Meksikës ka dekriminalizuar abortin në të gjithë vendin, dy vjet pasi vendosi se aborti nuk ishte një krim në një shtet verior.
Vendimi i mëparshëm kishte nisur një proces të rëndë të dekriminalizimit të abortit shtet pas shteti. Javën e kaluar, shteti qendror i Aguascalientes u bë shteti i 12-të që dekriminalizoi procedurën.
Gjyqtarët në shtetet që ende e kriminalizojnë abortin do të duhet të marrin parasysh vendimin e gjykatës më të lartë.
Vendimi gjithëpërfshirës i gjykatës vjen mes një tendence në Amerikën Latine për lehtësimin e kufizimeve për abortin, edhe pse qasja ka qenë e kufizuar në pjesë të Shteteve të Bashkuara.
Disa gra amerikane po kërkonin ndihmën e aktivisteve meksikane të abortit për të marrë pilulat e përdorura për t’i dhënë fund shtatzënisë së tyre.
Mexico City ishte juridiksioni i parë meksikan që dekriminalizoi abortin 15 vjet më parë.
GIRE, organizatë për të drejtat riprodhuese me qendër në Mexico City, tha se gjykata vendosi që pjesa e kodit penal federal që kriminalizon abortin nuk ka më asnjë efekt.
“Asnjë grua shtatzënë nuk do të mund të ndëshkohet për abort”, tha grupi në një deklaratë.
Gjykata urdhëroi që i ashtuquajturi krim i abortit të hiqet nga kodi penal federal.
Megjithatë, shumë organizatorë shqetësohen se heqja e kufizimeve mund të mos përkthehet në qasje të zgjeruar në vendet shumë konservatore dhe fetare.
