Partia Demokratike e Kosovës ka kërkuar themelimin e Komisionit Hetimor Parlamentar për procesin e subvencionimit të blerjes së teksteve shkollore dhe mjeteve mësimore për nxënësit e nivelit të arsimit fillor dhe të mesëm të ulët për vitin shkollor 2023-2024.
Në seancën plenare, deputetja e Partisë Demokratike të Kosovës (PDK), Floretë Zejnullahu tha se ky propozim ka ardhur në bazë të disa arsyeve, për çka përmendi hetimin për dështimin e sigurimit të teksteve shkollore falas edhe për nxënësit, për vlerësimin e kostos financiare të subvencionimit të teksteve shkollore e disa të tjera.
Zejnullahu potencoi se nga shtatori i vitit të kaluar, qeveria ende nuk ka njoftuar lidhur me numrin e nxënësve që kanë mbetur pa tekste shkollore dhe për koston financiare e cila do të rezultonte nga procesi i subvencionimit si mënyrë e blerjes së teksteve shkollore.
Zejnullahu: Të themelohet Komisioni Hetimor për procesin e subvencionimit të teksteve shkollore
“Asokohe qeveria kërkoi kohë shtesë në mënyrë që të siguroj të dhëna të mjaftueshme si për numrin e nxënëseve të cilët i kishte lënë pa tekste ashtu edhe për koston financiare e cila do të rezultonte nga procesi i subvencionimit si mënyrë e blerjes së teksteve shkollore. Megjithatë, nga shtatori e deri më sot, as Kuvendi dhe as qytetarët e Kosovës nuk janë njoftuar nga qeveria dhe as ministria përgjegjëse për arsim lidhur ë këtë proces, i cili në radhë të parë është zhvilluar pa bazë ligjore dhe në radhë të dytë ka shkaktuar pasoja të shumëfishta për prindërit, nxënësit dhe mësimdhënësit... Për të kuptuar arsyen e dështimit për të siguruar tekstet shkollore falas edhe për nxënësit nga klasa e 6 deri në klasën e 9, për të vlerësuar nëse të gjithë nxënësit janë pajisur me tekste shkollore, për të vlerësuar arsyet pse ka dështuar procesi i blerjes së teksteve nga ana e shtëpive botuese dhe shumë aspekte të tjera që e kanë karakterizuar këtë proces si grup parlamentar, në mbështetje të ligjit në fuqi për hetim parlamentar kemi propozuar këtë komision hetimor për hetimin e procesit të subvencionimit të blerjes së teksteve shkollore dhe mjeteve mësimore për nxënësit e nivelit të arsimit fillor dhe të mesëm të ulët për vitin shkollor 2023-2024”, tha Zejnullahu.
Lidhur me këtë propozim të PDK-së, ministrja e Arsimit, Shkencës dhe Teknologjisë, Arbërie Nagavci ka thënë se kjo kërkesë është e bazuar krejtësisht në të pa vërteta dhe pa saktësi.
Ajo tha se nuk ka asnjë raport, kërkesë apo ankesë nga drejtoritë e arsimit për mos pajisje të nxënësve e tekste shkollore.
Pavarësisht kësaj, Nagavci tha se mezi presin për themelimin e këtij komisioni, sipas saj për të hetuar të gjitha keqpërdorimet që e kanë ndodhur ndër vite kur partitë e tjera kanë udhëhequr ministrinë e Arsimit.
Nagavci: Mezi presim të themelohet ky komision për të parë keqpërdorimet ndër vite
“Ndonëse kërkesa e PDK-së për themelimin e këtij komisioni hetimor parlamentar është e bazuar krejtësisht në të pavërteta dhe në pasaktësi, unë personalisht, gjitha kabineti im dhe gjithë kolegët në ministri, mezi presim themelimin e këtij komisioni dhe të flasim për këtë temë sepse po, duhet hetuar të gjitha abuzimet për keqpërdorime që kanë ndodhur ndër vite, ndërkohën kur PDK-ja udhëhiqte më ministrinë e Arsimit. Por, jo vetëm PDK-ja. Në arsyetimin tuaj në kërkesën që e keni dërguar për themelimin e Komisionit Hetimor Parlamentar ju keni thënë se kemi dështuar në furnizimin me tekste shkollore për nxënësit. Kjo është e pavërtetë, ne nuk kemi asnjë raport, asnjë kërkesë, asnjë ankesë nga asnjë drejtori e arsimit e cila thotë se nuk janë furnizuar fëmijët apo se kanë mungesë të teksteve mësimore”, tha Nagavci.
Ndërkaq, nga grupi parlamentar i Aleancës për Ardhmërinë e Kosovës ka propozuar që ky hetim për subvencionimin e librave shkollorë të bëhet në kuadër të Komisionit për Arsim, në vend se të formohet një Komision Hetues Parlamentar. Sipas tyre, kështu s’do të ketë nevojë për mjete shtesë.
