Media sot raportoi për një incident që ka ndodhur mbrëmë në kompaninë ‘Rent a Car Galaktika’ në Prizren, ku dy persona janë therur me thikë, njëri prej të cilëve punëtor. Lidhur me rastin tani më janë arrestuar dy persona, të cilët ndodhen në masën e ndalimit policor.
Media mëson ekskluzivisht se bëhet fjalë për Gëzim Kastrati dhe Argëtim Kasolli.
Sipas burimeve, e gjithë përleshja ka nisur si pasojë e një konflikti për qiradhënien e një veture, që eskaloi më pas në përdorimin e mjetit të mprehtë nga Kasolli i cili dyshohet se theri me thikë dy viktimat.
Të njëjtat burime kanë bërë me dije se punëtori i kompanisë dhe miku i tij janë dërguar në QKUK për trajtim mjekësor për shkak të plagëve serioze.
Lidhur me rastin, Prokurori i Shtetit ka urdhëruar që vepra të rikualifikohet nga ‘Lëndim i rëndë trupor’ në ‘Vrasje në tentativë’, ndërsa dy të dyshuarit janë dërguar në mbajtje.
Sinjali ka kontaktuar kompaninë “Rent a Car Galaktika”, por personi që është përgjigjur në numrin e tyre kontaktues ka refuzuar të deklarohet lidhur me incidentin.
Shënim: Personat e apostrofuar në këtë artikull prezumohen të pafajshëm derisa fajësia e tyre të mos provohet me vendim të formës së prerë nga gjykata.
