Bashkimi Evropian ka kundërshtuar veprimin e Qeverisë, e cila vendosi që të marrë një shumë të parave nda Fondi i Mirëbesimit për veriut, që të paguajë një pjesë të borxhit për energjinë elektrike të shpenzuar në komunat veriore. Zyra e BE-së në Prishtinë ka thënë se pagesa e borxheve të energjisë elektrike nuk plotëson kriteret për financimin e projekteve nga Fondi i Mirëbesimit, siç parasheh marrëveshja ndërmjet Kosovës dhe Serbisë
Afro 12 milionë euro është shuma që Qeveria vendosi t’ua marrë katër komunave veriore për të shlyer një pjesë të borxhit për rrymën e papaguar nga banorët atje.
Por, një pjesë të këtyre parave, Ekzekutivi e ka marrë nga Fondi Zhvillimor i Mirëbesimit, i cili është krijuar në vitin 2013 në bazë të marrëveshjes për doganat mes Kosovës dhe Serbisë.
Mirëpo me këtë veprim nuk pajtohet Bashkimi Evropian. Zyra e BE-së në Kosovë ka thënë se marrëveshja nuk parasheh që paratë e këtij fondi të shpenzohen për qëllime të tilla.
“Aktualisht janë në dispozicion 3.6 milionë euro për disbursimin e projekteve të reja. Pagesa e borxheve të energjisë elektrike nuk plotëson kriteret për financimin e projekteve nga Fondi i Zhvillimit, të përcaktuara në Marrëveshjen e Brukselit për mbledhjen e të ardhurave doganore të datës 17 janar 2013”, thuhet në përgjigjen e zyrës së BE-së në Kosovë.
Media ka pyetur edhe ministrinë e Financave për vlerën e saktë të marrë nga fondi për të paguar borxhin e rrymës, por tash e dy ditë, ky institucion nuk ka kthyer përgjigje.
Qëllimi i këtij fondi është t’i zhvillojë dhe integrojë komunat veriore ku serbët që nga paslufta më 1999, nuk u binden vendimeve të institucioneve të Kosovës, por të strukturave paralele serbe që menaxhohen nga Serbia.
Paratë e Fondit grumbullohen nga importi i mallrave përmes pikave kufitare me Serbinë, Jarinjë dhe Bërnjak, të cilat gjenden në veri të vendit.
Sipas zyrës së BE-së, që nga themelimi i Fondit për Zhvillim, janë ndarë mbi 14.5 milionë euro për projekte të ndryshme për promovimin e zhvillimit socio-ekonomik të katër komunave veriore.
Zubin Potoku dhe Zveçani që udhëhiqen nga PDK-ja janë në mesin e komunave si Mitrovica e Veriut dhe Leposaviqi, të cilat preken nga vendimi i Ekzekutivit. E, kryetarit të Zveçanit, Ilir Peci është hatruar me Qeverinë. Ati thotë se ky vendim është marrë pa u konsultuar fare me të.
“Ta them të vërtetën, as nuk e shoh në mënyrë të rregullt diçka, e as nuk e refuzoj për arsye se Qeveria është ajo që vendos, Qeveria i ka marrë. Qëndroj në mendimin tim se është dashtë me marrë prej çdo kryetari të komunave të veriut, të paktën një mendim”, ka thënë kryetari i Zveçanit, Ilir Peci.
Dukagjini ka provuar të flasë edhe me kryetarët e komunave që udhëhiqen nga Lëvizja Vetëvendosje, si Mitrovica e Veriut dhe Leposaviqit, por ata kanë qenë të paqasshëm.
