Zyra e Prokurorit të Specializuar i ka konfirmuar operacionet që janë zhvilluar sot në Prishtinë.
Zëdhënësi Cristopher Bennett, tha për RTKlive tha se operacioni po mbështetet nga policia e Kosovës dhe EULEX-it.
“Zyra e Prokurorit të Specializuar është duke zhvilluar operacione të vazhdueshme në Kosovë.
Operacionet e PSP-së po mbështeten nga Policia e Kosovës dhe Misioni i Bashkimit Evropian për Sundimin e Ligjit në Kosovë (EULEX)”, tha ai.
Gjykata Speciale ka vazhduar edhe sot me bastisje,sot në mëngjes EULEX-i ka nisur bastisjet në shtëpinë e ish-kryetarit të Malishevës, Isni Kilaj.
Lajmi është bërë i ditur nga kryetari i OVL-UÇK-së në Malishevë, Metush Kryeziu. Kryeziu ka thënë se janë të indinjuar me aktet e tilla, të cilat i ka quajtur qyqare.
“Në vazhdën e këtyre bastisjeve, pjesëtarë të EULEX-it në mëngjesin e sotëm vazhduan me bastisjen e shtëpisë së komandantit Isni Kilaj . Çka po ndodhë? Pse po targetohet një grup i njerëzve dhe ai grup i cili është i afërt me Thaçin. Tashmë kjo gjykatë në mungesë të fakteve po bën spektakël. Turp!”, ka shkruar Kryeziu në Facebook.
