Policia e Kosovës sot ka zhvilluar një aksion të bastisjes në KEK. Në këtë aksion është bastisur edhe zyra e drejtorit të kësaj korporate, Nagip Krasniqi, i cili po dyshohet për keqpërdorim të detyrës zyrtare.
Policia e Kosovës gjatë ditës e ka konfirmuar se ka kryer sot bastisje në zyrat qendrore të Korporatës Energjetike të Kosovës-KEK në Prishtinë.
Ndërsa, Korporata Energjetike e Kosovës-KEK ka potencuar se nuk ka ndonjë informacion zyrtar për këtë çështje.
“Korporata Energjetike e Kosovës njofton opinionin se sot ka pas një kontrollë nga Policia e Kosovës dhe se nuk ka ndonjë informacion zyrtar rreth arsyeve të kësaj kontrolle".
Lidhur me dyshimet për keqpërdorime në KEK ka pasur akuza edhe më parë nga opozita.
Deputeti i LDK-së, Armend Zemaj, për këtë gjë ka akuzuar kryeministrin Kurti, për siç e quan ai, talljen e cila i kushtoi 4.4 milionë euro më shumë për çdo muaj vetëm për shkak të mos funksionimit të bllokut A5.
“Te interferimet e njerëzve të Lëvizjes Vetëvendosje, këshilltarëve të pensionuar, të nomenklaturës së kaluar, të cilët janë instaluar në Vetëvendosje dhe nga atje japin këshilla për Korporatën Energjetike të Kosovës për menaxhmentin ku ishte edhe rasti me anulimin e tenderit për riparim, ku edhe ky tender, kushtoi 2 milionë më shumë se në vitin 2020 dhe kjo nuk ka emërtim tjetër përpos aferë korruptive edhe korrupsion masiv mbi kurrizin e qytetarëve të vendit”, ka deklaruar Zemaj.
