Kryetari i Lidhjes Demokratike të Kosovës, Lumir Abdixhiku ka thënë se dimri i këtij viti do të jetë më i rëndi që e ka përjetuar Kosova ndonjëherë, përcjell "Bota sot".
Sipas tij, faturat e shtrentja dhe reduktimet e rrymës do t`i godasin rëndë familjet dhe bizneser.
Ai është shprehur se, ndonëse kriza nuk buron në Kosovë, përballueshmëria e saj varet nga politikat e Qeverisë së Kosovës.
“KUR PUSHTETI FLE
Dimri i këtij viti do të jetë më i rëndi që Kosova ka përjetuar ndonjëherë. Reduktimet e energjisë dhe faturat e shtrenjta do të godisin secilën familje kosovare e secilin biznes - prodhues, tregtar e shërbyes pa dallim. Kjo krizë e re, nuk buron në Kosovë, por përballueshmëria e saj varet vetëm nga politikat e Qeverisë së Kosovës - e cila, ndonëse e paralajmëruar me kohë, vazhdon me kokëfortësi vetëm të vëzhgojë.
Rryma nuk ruhet në frigorifer, por ajo blehet sot për nesër gjithandej në Evropë. Termocentralet riparohen me kohë; resurset alternative përgatiten për prodhim - s’mbyllen sikurse i kanë mbyllur sot - e marrëveshjet ndërshtetërore paraprihen kur përballë ke një krizë katastrofike si kjo e ardhmja e jonë, rajonit e më gjërë”, ka thënë Abdixhiku.
Kreu i LDK-së, theksoi se në dy vjet qeverisje, asnjë potencial i ri energjetik nuk po merr formë, derisa ka përmendur refuzimin e termocentralit me gaz të refuzuar nga qeveria në vitin 2021.
“Projekti i vetëm gjenerues, ai i termocentralit me gaz, është refuzuar në mars 2021. Në vend të prodhimit, bateritë - pra deponimi i energjisë - ka marrë prioritet. Para se të deponosh duhet të prodhosh. Së pari ‘fabrika’ më pas ‘depoja’. Një depo energjetike pa prodhim është investim nga fundi.E ndonëse kishim gjithë pranverën e verën në dispozicion, asnjë masë grumbulluese e resurseve alternative për ngrohje nuk është ndërmarrë”, është shprehur ai.
Ai po nënvizoi se edhe familjet e goditura me inflacion rekord e me mungesë investimesh kapitale si asnjëherë më parë, as nuk janë paralajmëruar për krizë, e as nuk u janë lehtësuar çmimet e drunjëve, peletit e lëndëve djegëse me kohë.
“Në shtator, kur vera të mbarojë, një pako e re fiskale do duhej të ishte e gatshme; siç do të duhej të ishin të gatshme subvencionimet dhe koordinimet me institucionet e energjisë.
Asnjë nga këto masa nuk diskutohet në Kosovë sot. Po futemi drejt theqafjes, me një Qeveri që s’ka plan e as ide si të na kapërcejë përtej dimrit më të vështirë ndonjëherë. Ndonëse do t’i bëjë dy vjet pa lënë asnjë shenjë, e edhe me një dimër të vështirë, ata do të shërbehen me arsyetimet e zakonshme tashmë për 20 vjet”, ka përfunduar ai.
