Përkujtohet dëshmori i parë i UÇK-së nga Lugina e Preshevës, Ibrahim Fejzullahu.
Në vendlindjen e tij në fshatin Gosponicë të Preshevës, aty ku edhe u vra në një luftë të pabarabartë me forcat serbe të sigurisë më 29 maj të vitit 1999, u nderuar jeta dhe vepra e Ibrahim Fejzullahut në 23 vjetorin e rënies së tij në altarin e lirisë.
“Këto anë të Karadakut të Preshevës kanë shërbyer si korridor furnizimi për luftën çlirimtare, qoftë për sigurimin e armatimit apo edhe luftëtarëve të lirisë, në secilin aksion Ibrahim Fejzullahu ishte prezent. Më 29 maj të vitit 1999, Ibrahimi në një luftë të pabarabartë me pjestëratë e forcave serbe të sigurimit ra heroikisht si dëshmorë i parë i Ushtrisë Çlirimtare të Kosovës nga Kosova Lindore”, tha Nazmi Hajredini - Kryetari i OVL të UÇPMB-së.
E babai i dëshmorit të parë të UÇK-së nga Presheva, Sejdi Ibrahimi, falënderoi pjesëmarrësit, ai tha se familja e tij i ka dhënë kombit 35 dëshmorë.
“ Deri në luftën e UÇK-së, familja jonë i ka dhënë 33 dëshmorë, djali im Ibrahimi dhe vëllau im Rahimi, janë dëshmorët e tridhjetë e pestë të familjes sonë, që ua japin atdheut jetën e tyre”, ka deklaruar Sejdi Ibrahimi – baba i dëshmorit Ibrahim Fejzullahu.
Ibrën e kujtuan edhe bashkëluftëtarët. Qani Fejzullahu, bashkëluftëtarë i Ibrahimit, ka evokuar kujtimet e tija nga koha kur të qent në shërbim të atdheut ishte më e vlefshme se vetë jeta. Ai ka thënë se Ibrahimi e donte atdheun dhe atij ia fali jetën.
Shtabi i Përgjithshëm i Ushtrisë Çlirimtare të Kosovës, në rajonin e Preshevës kishte njësinë saja mbështetëse e cila numëronte dhjetëra luftëtarë. Ibrahim Fejzullahu ishte dëshmori i parë i kësaj njësie.
