Lufta në Ukrainë mund ta shtrenjtojë edhe më shumë rrymën në Kosovë. Sektori i energjisë është goditur në gjithë bursën ndërkombëtare, andaj qeveria po kërkon t’i vazhdojë edhe për 30 ditë masat emergjente që ia lejojnë kufizimin e përdorimit të rrymës, nëse ka nevojë.
Kjo ide e ministres Artane Rizvanolli e mori aminin në Kuvend, përmes votave të Vetëvendosjes dhe AAK-së.
Deputeti Haki Abazi tha se Kosova mund të përballet me destabilizim në treg, edhe në sektorin privat.
Megjithëse e përkrahi, Pal Lekaj kërkon të veprohet më shpejt në veri.
Më sfiduese u tregua Hykmete Bajrami nga LDK, që tha se masat emergjente nuk qenë efektive.
“Kemi përfunduar me dhënien e 120 milionë eurove nga buxheti i Republikës së Kosovës dhe me rritje të tarifave”, tha ajo.
Por ministrja Rizvanolli shpjegoi se, megjithatë, i ndalën shpenzimet e tepërta, si ndalja e mihjes së kriptovalutave.