Konfiskimi i pasurisë së pajustifikueshme do të bëhet vetëm me vendim të Gjykatës.
Kështu ka njoftuar Genc Nimoni, Shefi i Kabinetit të ministres së Drejtësisë, Albulena Haxhiu, teksa foli rreth Projektligjit për themelimin e Byrosë Shtetërore për Verifikimin dhe konfiskimin e Pasurisë së Pajustifikishme.
Përmes një postimi në Facebook, Nimoni tha se kjo është njëra ndër iniciativat më serioze dhe profesionale të Ministrisë së Drejtësisë.
“Për sqarimin e nevojshëm, konfiskimi i pasurisë së pajustifikueshme do të bëhet vetëm nga gjykata, ndërsa roli i Byrosë është verifikimi fillestar i saj. Gjykata garanton procedura profesionale dhe respektim të të drejtave të palëve në procedurë. Nuk ka prezumim të pafajësisë në çështje civile. Për juristët mbetet e qartë kjo dhe ky parim”, shkroi ndër tjerash ai.
Sipas tij, ky Projektligj është shumë i qartë dhe nuk cenon pavarësinë e pushteteve.
“Projektligji është shumë i qartë dhe nuk cenon pavarësinë e pushteteve. Byroja si një agjenci shtetërore e themeluar me Ligj nga Kuvendi, është e pavarur në verifikimin e pasurisë së zyrtarëve publik dhe të ekspozuarve politikë, me c’rast në procedurë civile dërgon lëndët në gjykatë për t’i trajtuar gjykata. Pala të cilit i verifikohet pasuria në çdo kohë mund të argumentojë para gjykatës se pasurinë e ka fituar në mënyrë të ligjshme”, thuhet ndër tjerash në postim.
