Nga shpërthimi i një bombole këtë të marte në qytetin e Ferizajt kanë mbetur të lënduar 43 persona në mesin e tyre edhe fëmijë.
14 nga të lënduarit kanë pranuar mjekim në Qendrën Klinike Universitare të Kosovës (QKUK). Pesë nga ata janë në gjendje më të rëndë shëndetësore, njofton Klan Kosova.
Drejtori i Klinikës Intensive në QKUK, Shaqir Uka, ka thënë se këta pesë të lënduar deri tani pretendohet të jenë në gjendje stabile.
“Gjendja shëndetësore e pacientëve për momentin pretendohet me qenë stabile edhe pse me këtë shkallë të djegies këta pacientë hyjnë në radhën e atyre pacientëve që janë të rrezikuar”, tha Uka.
Ndërsa, drejtori i Kirurgjisë Plastike, Zejn Buja, ka thënë se 14 persona kanë pranuar mjekim tek ata dhe janë futur në operacion.
“Gjashtë nga këta pacientë janë në gjendje më të rëndë shëndetësore dhe janë dërguar në Klinikën Intensive dhe tetë pacientë janë me djegie të themi mesatare dhe janë të shtrirë në klinikën tonë”, ka thënë Buja.
