Ish deputeti i LDK-së, Naser Rugova, ka thënë se disa nuk po e kuptojnë shqetësimin e tij rreth lidhjes mes buxhetit dhe zgjedhjeve të parakohshme.
Përmes një postimi në Facebook, ai ka thënë se afati i fundit për votimin e buxhetin është marsi i vitit 2021 dhe nëse VV dhe PDK duan zgjedhje, atëherë duhet votuar buxhetin, përndryshe do të jenë përgjegjëse për bllokadën totale financiare të vendit me 1 Prill 2021, përcjell Bota sot.
Rugova ka thënë se dje në Beograd u pa qartë që lista serbe nuk e sheh më veten pjesë të koalicionit dhe veprimet e tyre tregojnë se ata po punojnë kundër qeverisë Hoti, andaj zgjedhjet e jashtëzakonshme janë të pashmangshme.
Ai ka thënë se ato nuk mund të mbahen para shkurtit 2021, andaj nuk ka gjasa teorike që qeveria e ardhshme të zgjedhet para Majit 2021 dhe ta kalojë buxhetin.
Postimi i tij i plotë:
E shoh që disa prej juve nuk e kuptoni drejt shqetësimin tim rreth lidhjes mes buxhetit dhe zgjedhjeve të parakohshme. Unë kam qenë deputet në dy mandate dhe e njoh mirë dinamikën e punës shtetërore.
Afati i fundit për votimin e buxhetit është Marsi i vitit 2021. Nëse VV dhe PDK vërtet duan zgjedhje atëherë duhet votuar buxhetin, përndryshe do të jenë përgjegjëse për bllokadën totale financiare të vendit me 1 Prill 2021.
Dje në Beograd u pa qartë që lista serbe nuk e sheh më veten pjesë të koalicionit. Veprimet e tyre destruktuve në Kuvend janë po ashtu tregues që ata tashmë punojnë kundër qeverisë Hoti. Shto kësaj edhe pamundësinë për marrëveshje rreth Presidentit dhe bëhet e qartë që zgjedhjet e parakohshme janë të pashmangshme. Zgjedhjet e parakohshme nuk mund të mbahen para Shkurtit 2021, që do të thotë nuk ka gjasa teorike që qeveria e ardhshme të zgjedhet para Majit 2021 dhe ta kalojë buxhetin, kjo në skenarin më të mirë.
Nuk duhet t'ia komplikojmë jetën qytetarit pa nevojë e për inate provinicale. Duhet lënë retorikat propagandistike dhe duhet marrë vendime serioze për vendin.
Për të tjerat le të vendos sovrani.
