(E plotësuar 09:47) - Prizreni është tronditur mbrëmë nga një rast që ka ndodhur në rrugën “Durmish Asllani”.
Zyrtari policor, Salih Mazreku dhe e bija e tij Leonita janë gjetur të vdekur në shtëpinë e tyre, derisa dyshimet e para janë se babai fillimisht e ka vrarë vajzën e pastaj veten.
Nga Policia e Kosovës sot kanë bërë të ditur se janë intervistuar disa dëshimtarë familjar të viktimave.
“Prizren 15.12.2020 – 19:10. Është raportuar se një zyrtar policor dhe vajza e tij janë gjetur pa shenja jete në shtëpinë e tyre. Në vendin e ngjarjes kanë dalë të gjitha njësitë përkatëse policore prokurori dhe mjekësia ligjore. Janë intervistuar disa dëshmitar familjar të viktimave, me urdhër të prokurorit trupat e pa jetë janë marrë nga mjekësia ligjore për Obduksion”, thuhet në raport.
***
Prizreni është tronditur mbrëmë nga një rast që ka ndodhur në rrugën “Durmish Asllani”. Babë e bijë janë gjetur të vdekur në shtëpinë e tyre, derisa dyshimet e para janë se babai fillimisht e ka vrarë vajzën e pastaj veten.
E në momentin kur ka ndodhur rasti, në shtëpi ka qenë edhe vëllai i viktimës.
Një gjë të tillë e ka konfirmuar zëdhënësi i Policisë për Rajonin e Prizrenit, Shaban Osmanollaj.
“Vëllai i viktimës ka qenë në vend të ngjarjes. Dëshmitarët përreth, fqinjët, e kanë lajmëruar rastin. Jemi duke punuar që të zbardhet ky rast. Ata kanë qenë në shtëpi dhe mund të intervistohen si dëshmitarë”, ka thënë Osmanollaj.
Ndryshe, ngjarja dyshohet se ka ndodhur pak minuta para se polici do të duhej të nisej për në vendin e tij të punës, aty ku po punonte tash e një kohë si doganier.
Detaje për këtë rast kanë dhënë dje edhe nga Prokuroria e Prizrenit. Kryeprokurori Admir Shala ka thënë se janë duke punuar në zbardhjen e rrethanave.
“Ka ndodhur një rast tragjik, ku ne një shtëpi janë gjetur 2 viktima, qe dyshohet se janë vrare nga arma e zjarrit. Viktimat janë familjare, babë e bije. Njeri nga viktimat dyshohet se është zyrtar policor. Prokurori se bashku me Policinë dhe njësite tjera relevante kane dalur ne vendin e ngjarjes. Nuk dihen akoma rrethanat se si ka ndodhur rasti”, ka thënë Shala.
Në Policinë e Kosovës ndërkaq thonë se babë e bijë u konfirmuan të vdekur në vend të ngjarjes nga mjekët kompetentë.
“Me 15.12.2020, pak pas orës 19:00, Policia ka pranuar një informacion se në rrugën “Durmish Asllani” në Prizren, janë dëgjuar të shtëna nga arma e zjarrit. Njësitet kompetente policore, menjëherë i janë përgjigjur vendit të ngjarjes dhe bazuar në informacionet e para, në një shtëpi banimi janë gjetur dy trupa të pa jetë, një M/Kosovar zyrtar policor dhe një F/Kosovare, vdekjen e të cilëve e kanë konfirmuar mjekët kompetent”, ka thënë zëdhënësi i PK-së, Baki Kelani.
Në vendin e ngjarjes menjëherë pas rastit kanë dalur të gjitha njësitet policore përfshirë forenzikën, ekipet mjekësore dhe prokurorin.
