Kurt Bassuener nga organizata ndërkombëtare Këshilli për Politikën e Demokratizimit në Berlin, është shprehur i shqetësuar se një rikthim i mundshëm i Donald Trumpit në krye të Amerikës, mund të rikthejë edhe idenë e shkëmbimit të territorit mes Kosovës dhe Serbisë.
Duke folur për gazetën “Bota sot”, eksperti gjerman ka thënë se marrëdhëniet e Trumpit me Serbinë, janë aktive, duke iu referuar deklarimeve të ish-ambasadorit Richard Grenell dhe investimeve të dhëndrit të Trumpit, Jared Kushner në Shqipëri e Serbi.
Ai e ka vlerësuar situatën në rajon si shumë “të rëndë”.
“Unë shqetësohem se "shkëmbimi i tokës" (ose "korrigjimi i kufirit" apo "rregullimi i vijës administrative", në varësi të cilit prej sponsorëve të tij po flitej), mund të rikthehet në rast të një administrate të dytë Trump. Është e qartë se presidenti Vuçiq në Serbi e pret me padurim një perspektivë të tillë. Dhe deklaratat pasuese të ish të dërguarit të tij Richard Grenell dhe investimet në Beograd dhe Shqipëri nga dhëndri i tij Jared Kushner, tregojnë se këto marrëdhënie mbeten aktive. Trump, ashtu si Vuçiq, është një etnonacionalist dhe rrotullimi që ai dhe administrata e tij bënë mbi Marrëveshjen e Uashingtonit mund të parashikojë "kthimin e tij në pus", duke iu dhënë mundësia. Tani është një situatë shumë më e rëndë në nivel global dhe rajonal”, ka deklaruar Bassuener për “Bota sot”.
Ai hedh dyshimet e tij se presidentja dhe kryeministri i Kosovës, do të pranonin ndarjen e vendit.
“Është e dyshimtë që kryeministri ose presidentja aktuale e Kosovës, do të pajtohej me një ndarje të tillë - por zgjedhjet parlamentare janë para, kështu që konfigurimi mund të ndryshojë”, ka nënvizuar eksperti.
Bassuener ka parashikuar që ndarja e Kosovës, do të rrezikonte edhe fqinjtë e saj.
“Jo vetëm që një ndarje e tillë do të dëmtonte mirëmbajtjen e kufijve aktualë në rajon, por do të forconte autoritarizmin e thelluar të Serbisë - i cili është një rrezik jo vetëm për Kosovën, por edhe për fqinjët e tjerë të Serbisë, Bosnjën, Malin e Zi dhe Maqedoninë e Veriut”, ka pohuar ai.
Ai ka kërkuar reagim nga Bashkimi Evropian.
“Është e rëndësishme që BE-ja, ndryshe nga gjashtë vjet më parë, të artikulojë kundërshtimin e saj kolektiv ndaj ndryshimeve të kufijve”, ka thënë Kurt Bassuener për gazetën “Bota sot”.
Se ideja e shkëbimit të territoreve mund të rikthehet edhe më fuqishëm së herën e parë, me rikthimin e Trumpit, e ka pohuar së fundmi në një intervistë për gazetën “Bota sot” edhe studiuesi i lartë dhe koordinatori i projekteve në Institutin Shqiptar për Studime Ndërkombëtare (AIIS) në Tiranë, Ledion Krisafi. Ai ka kërkuar nga Qeveria e Kosovës, që të përgatitet për një skenar të tillë./Botasot
