Profesori dhe eksperti amerikan për politikën dhe çështjet e Ballkanit në Universitetin e Nju Jorkut, Alon Ben-Meir, ka thënë se çlirimi i Kosovës 25 vjet më parë, ishte një pikë kthese historike drejt hapjes së rrugës për pavarësinë e vendit.
Ai ka rikujtuar se regjimi i kasapit të Ballkanit, Slobodan Millosheviq, kreu pastrim etnik në Kosovë.
“Kosova festoi 25 vjetorin e çlirimit të saj, kur forcat serbe u tërhoqën pas një fushate 78-ditore të bombardimeve të NATO-s. Kjo ngjarje shënoi një pikë kthese historike, duke hapur rrugën për pavarësinë e Kosovës dhe duke krijuar një nga kombet më të rinj të Evropës. Gjatë kësaj lufte që u zhvillua në vitet 1998/1999, regjimi serb i Millosheviqit u angazhua në spastrim etnik, duke rezultuar në dëbimin me forcë të mbi 1 milion shqiptarëve nga Kosova dhe vdekjen e 13,000 civilëve, me 1,600 ende të zhdukur. Ndërhyrja ushtarake e NATO-s detyroi trupat serbe të tërhiqen, të cilat gjatë daljes së tyre kryen masakra masive të afro 10.000 civilëve”, ka thënë Ben-Meir, për gazetën “Bota sot”.
Eksperti ka përmendur një deklaratë të ish-kryeministrit të Britanisë së Madhe Tony Blair, në vizitën e tij të fundit në Kosovë.
“Në një vizitë të fundit në Prishtinë, ish-kryeministri britanik Tony Blair, i cili luajti një rol kryesor në orkestrimin e ndërhyrjes së NATO-s për të parandaluar gjenocidin në Kosovë, deklaroi në një fjalim se “Lufta për Kosovën nuk ishte vetëm për Kosovën, por për të gjithë ne, duke përfshirë edhe vendin tim, të cilët besojnë se liria dhe drejtësia ia vlen të ngrihej dhe, nëse është e nevojshme, të luftosh për to”. Ai shtoi, “Po të kishim lejuar që Kosova dhe populli i saj të vazhdonin të brutalizoheshin, të drejtat e tyre t'u hiqeshin, të vidhej e ardhmja, e ardhmja jonë në vende si e imja do të ishte pakësuar”, ka cituar profesori, deklaratën e Blair.
Ai ka theksuar më tej se “mjerisht, pas 25 vitesh, tensionet mes Kosovës dhe Serbisë vazhdojnë”, pasi “presidenti serb Vuçiq ende refuzon të njohë pavarësinë e Kosovës”.
25 vjet pas çlirimit, sipas ekspertit të Ballkanit, Kosova ende përballet me sfida të shumta në sektorë të ndryshëm dhe për këtë ai ka “fajësuar” të gjitha qeveritë e deritanishme. Ai ka akuzuar politikanët se kanë grumbulluar pasuri për veten e tyre, duke lënë qytetarët pa shpresë.
“Fatkeqësisht, qeveritë e njëpasnjëshme në Kosovë, duke përfshirë edhe atë aktuale të kryesuar nga kryeministri Kurti, kanë bërë përparim të kufizuar në zhvillimin e kombit. Në të vërtetë, edhe pse Kosova ka popullsinë më të re në Evropë dhe burime dhe potencial të konsiderueshëm njerëzor, Kosova përballet me sfida të shumta në sektorë të ndryshëm, duke përfshirë kujdesin shëndetësor, arsimin, punësimin dhe infrastrukturën. Në vend që të nxisin rritjen, për 25 vitet e fundit, politikanët e të gjitha shtresave politike kanë grumbulluar pasuri, duke lënë shumicën e popullsisë në një vend ku ata shohin pak shpresë, gjë që çon në një ikje të trurit të të rinjve që janë të domosdoshëm për të ardhmen e vendit nëse dëshiron të bëhet një shtet i qëndrueshëm, i fortë dhe progresiv”, ka potencuar Alon Ben-Meir për “Bota sot”.
Ai nuk ka lënë pa përmendur edhe vrasjen e grave në Kosovë.
“Për më tepër, vendi përballet me një shkallë të lartë të femicideve, me shumë gra që vriten çdo vit. Investimet e huaja janë të pakta dhe përmendjet e shpeshta të Kurtit për mundësinë e ripërtëritjes së konfliktit me Serbinë i pengojnë investitorët e mundshëm të konsiderojnë investimin në Kosovë, nga frika se “tensioni i lartë” midis dy vendeve mund të shpërthejë në një zjarr të dhunshëm”.
Profesori ka vlerësuar se «shqiptarët e Kosovës janë më pro-amerikanët».
Sipas tij, Kosova tani ka një mundësi historike.
“Ata tani kanë një mundësi historike për t'u fokusuar në zhvillim, për të eliminuar korrupsionin dhe për të punuar ngushtë me aleatët e saj perëndimorë që ofrojnë një rrugë drejt prosperitetit, rritjes dhe një të ardhmeje premtuese, veçanërisht për të rinjtë.
Bashkohem me zërat e shumë njerëzve brenda dhe jashtë vendit dhe përgëzoj popullin e Kosovës për arritjen e kësaj pike të lavdishme të pavarësisë së tij, duke kujtuar se sakrificat që ata bënë kanë çuar në triumfin e tyre, i cili tani duhet të përkthehet në ndërtimin e kombit në të cilin çdo individ, i ri e i madh, krenohet”, ka thënë Ben-Meir për gazetën “Bota sot”.
