Të shtënat me armë në ahengjet në Kosovë janë dukuri e shpeshtë, të cilat përveç se janë të kundërligjshme, shumë herë janë edhe të rrezikshme. Ka disa raste kur nga të shtënat festive, kanë pësuar edhe me jetë qytetarët e pafajshëm, madje edhe ata që nuk ishin pjesë e ahengjeve.
Kështu ka ndodhur edhe të dielën në Podujevë, ku një person po dyshohet se kishte gjuajtur me armë në një aheng familjar.
Burimet e sinjalit brenda Prokurorisë kanë bërë me dije se njësitë policore kanë dalë në vendin e ngjarjes, ku kanë gjetur rreth 20 gëzhoja, si dhe është kapur i dyshuari.
I njëjti është arrestuar dhe shoqëruar në stacion policor, ku ka dhënë deklaratën e tij.
Me urdhër të prokurorit, i dyshuari është ndaluar dhe ndaj tij është iniciuar rasti për veprat penale ‘Përdorim i armës apo mjetit të rrezikshëm’ dhe ‘Shkaktim i rrezikut të përgjithshëm’.
Kujtojmë se në vazhdimësi është bërë thirrje që të festohet pa armë, por siç duket këto thirrje kanë hasur në vesh të shurdhër.
