Të paktën pesë persona u plagosën në Ukrainë të dielën nga sulmet ruse, thanë zyrtarët lokalë, ndërsa të dy vendet shkëmbyen sulme me dronë, raketa dhe granatime.
Përgjatë vijës së frontit në lindje, Rusia tha se kishte marrë nën kontroll dy fshatra, një në rajonin e Kharkiv dhe një në rajonin e Luhansk.
Kievi nuk ka komentuar ende, por zyrtarët lokalë thanë të dielën në mëngjes tre persona u plagosën nga sulmet me dronë rus në rajonin pjesërisht të pushtuar Kherson të Ukrainës jugore.
Në verilindje të vendit, zyrtarët në rajonin e Kharkiv thanë se dy persona u plagosën kur një fshat u godit nga predha ruse.
Forcat ajrore të Ukrainës raportohet se rrëzuan 35 nga 39 dronët Shahed të prodhuar nga Irani që Rusia lëshoi gjatë natës.
Forca ajrore tha gjithashtu se Rusia lëshoi tre raketa balistike Iskander-M dhe dy raketa lundrimi.
Ata pretenduan se raketat e lundrimit nuk arritën objektivat e tyre për shkak të “kundërmasave” të Ukrainës, por nuk përmendën se çfarë goditën raketat Iskander-M ose nëse ishte shkaktuar ndonjë dëm.
Nuk raportohet për viktima, shkruan Euronews.com.
Sipas raportimeve, forcat ruse sulmojnë rregullisht zonat civile në të gjithë Ukrainën, por sulmet e tyre në rrjetin energjetik të Ukrainës janë intensifikuar muajt e fundit.
Thuhet se kjo ka rezultuar në dëmtime të rënda në shumë objekte energjetike dhe ka detyruar Ukrainën të imponojë ndërprerje të gjata të energjisë elektrike.
Autoritetet ukrainase thanë se forcat ruse filluan sulmet e tyre në tre lokacione, duke përfshirë rajonin rus të Kurskut, Primorsko-Akhtarsk – një qytet në Krasnodar Krai në bregun e Detit Azov dhe Krimenë e pushtuar.
