Presidenti turk Rexhep Tajip Erdogan akuzoi të mërkurën fuqitë perëndimore se mbështesin ato që ai tha se ishin planet izraelite për të sulmuar Libanin dhe për të “përhapur luftë” në të gjithë rajonin.
“Izraeli po i drejtohet tani Libanit dhe ne shohim se fuqitë perëndimore në prapaskenë po i mbështesin ata”, u tha ai ligjvënësve nga partia e tij në pushtet AKP, shkruajnë mediat e huaja.
Sipas tij, “planet e kryeministri izraelit Benjamin Netanyahut për të përhapur luftën në rajon do të çojnë në një fatkeqësi të madhe”.
“Është… patetike që shtetet që flasin për lirinë, të drejtat e njeriut dhe drejtësinë janë robër të një personi të sëmurë mendor si Netanyahu”, citohet të ketë thënë më tej ai.
Deklaratat e tij erdhën pasi u rrit shqetësimi për kërcënimet e përshkallëzuara dhe shkëmbimet e vazhdueshme ndërkufitare të zjarrit midis forcave izraelite dhe Hezbollahut të Libanit të mbështetur nga Irani, duke nxitur frikën se ato mund të çojnë në një luftë të plotë.
Dhuna kufitare e Libanit shpërtheu pasi militantët e Hamasit organizuan një sulm të paprecedentë në Izraelin jugor, duke shkaktuar një operacion masiv hakmarrës izraelit, i cili është në vazhdim.
Netanyahu ka thënë se forcat izraelite tani po përfundojnë pjesën më intensive të luftës së Gazës dhe do të rivendosen në kufirin verior, duke e cilësuar këtë veprim si mbrojtje.
Madje, javën e kaluar, Izraeli tha se planet e tij për një ofensivë në Liban ishin “miratuar dhe vërtetuar”.
