Ushtria izraelite po heton pretendimet se dhjetëra njerëz janë vrarë në sulmet në Gaza, të cilat sipas saj kishin në shënjestër organizatorin e sulmit të 7 tetorit.
Ministria e shëndetësisë e drejtuar nga Hamasi tha se të paktën 71 njerëz vdiqën dhe 289 të tjerë u plagosën në sulmin në qytetin jugor të Khan Younis, i cili goditi tendat e refugjatët që po largoheshin nga konflikti.
Grupi militant i ka përshkruar sulmet si “një përshkallëzim të rëndë” dhe prova që Izraeli nuk ishte i interesuar për një armëpushim, shkruan skynews.
Një zyrtar izraelit i sigurisë ka konfirmuar se objektivi i sulmit ishte shefi ushtarak i Hamasit, Mohammed Deif.
Ai ishte komandanti i fshehtë pas sulmit të papritur të Hamasit ndaj Izraelit tetorin e kaluar, i cili shkaktoi luftën shkatërruese në Gaza.
Një zyrtar i lartë i Hamasit mohon raportet izraelite se komandanti i krahut ushtarak të grupit, Mohammed Deif, ishte shënjestruar në sulmin ajror izraelit në zonën al-Mawasi në Khan Younis.
“Akuzat izraelite janë të pakuptimta dhe synojnë të justifikojnë masakrën e tmerrshme. Të gjithë dëshmorët janë civilë dhe ajo që ndodhi ishte një përshkallëzim i rëndë i luftës së gjenocidit, i mbështetur nga SHBA dhe heshtja botërore”, tha për reuters zyrtari i lartë i Hamasit, Sami Abu Zuhri.
