Gjashtë persona janë konfirmuar, përmes testeve laboratorike, se janë infektuar me kolerë në Rangoon, qyteti më i madh i Mianmarit, njoftoi të shtunën një zëdhënës i juntës ushtarake që sundon kombin aziatik.
Regjimi urdhëroi mbylljen e përkohshme të restoranteve në zonën ku ata jetojnë.
Nëntë persona, banorë të një “distrikti të pushtuar” në qendrën tregtare të Rangoon, u shtruan në spitale me diarre akute dhe njëri prej tyre u diagnostikua pas testeve laboratorike si i infektuar me kolerë, shpjegoi zëdhënësi i regjimit ushtarak. Në ndërtesat e pushtuara ka vetëm rreth dhjetë tualete komunale për mbi 600 persona. Testet e mëvonshme në dy spitale të Rangoon zbuluan pesë raste të tjera të kolerës.
Një burrë që vuante nga SIDA – ai nuk ishte testuar për bakterin e kolerës – vdiq.
Ministria e shëndetësisë e juntës u dërgoi një SMS pronarëve të telefonave celularë, duke u kërkuar atyre që të marrin masa paraprake shtesë kur bëhet fjalë për ruajtjen e higjienës.
Kolera është një sëmundje shumë ngjitëse, e shkaktuar nga ngrënia e ushqimit ose pirja e ujit të kontaminuar me bakterin që e shkakton atë, sipas Organizatës Botërore të Shëndetësisë (OBSH).
Sëmundja, e cila shkakton diarre, të vjella dhe ngërçe torturuese të muskujve, përhapet me shpejtësi në zonat ku kushtet sanitare janë të këqija.
Sipas shifrave të OBSH-së, rastet e kolerës në mbarë botën vlerësohet të arrijnë në 1.3 deri në 4 milionë në vit, ndërsa sëmundja është përgjegjëse për deri në 143,000 vdekje.
