Ministri izraelit i Mbrojtjes Yoav Gallant diskutoi një kalim në një fazë të re të luftës në Gaza me të dërguarin e ShBA-së dhe këshilltarin e lartë të Presidentit amerikan Joe Biden Amos Hochstein.
Kjo ndodhi gjatë takimit të tyre në Washington.
“Ministri Gallant i tha Hochstein se kalimi në ‘Fazën C’ në luftën në Gaza do të ndikojë në zhvillimet në të gjitha frontet dhe se Izraeli po përgatitet për çdo skenar si ushtarakisht ashtu edhe diplomatikisht”, tha Ministria izraelite e Mbrojtjes në deklaratën të hënën.
Zyrtarët izraelitë nuk kanë sqaruar ende se çfarë do të thotë Gallant me “Fazën C”, por më 20 tetor, Gallant dhe Komiteti i Punëve të Jashtme dhe Mbrojtjes së Knesset thanë se lufta kundër Hamasit do të kishte tre faza kryesore.
Faza e Parë do të përfshinte një fushatë ushtarake që përfshin mjete ajrore dhe tokësore, ndërsa Faza e dytë do të përfshinte luftime, por me “intensitet më të ulët” dhe për të “eliminuar xhepat e rezistencës”.
Gallant tha se hapi i tretë “do të jetë krijimi i një regjimi të ri sigurie në Rripin e Gazës, heqja e përgjegjësisë së Izraelit për jetën e përditshme në Rripin e Gazës dhe krijimi i një realiteti të ri sigurie për qytetarët e Izraelit.
Është e paqartë nëse Faza C synohet si faza e tretë e planit të përshkruar më parë nga Gallant. CNN ka kontaktuar me Ministrinë e Mbrojtjes të Izraelit për sqarime, por ende nuk ka marrë përgjigje.
Gallant tha në X pas takimit se ai i theksoi Hochstein se “kalimi në fazën III të luftimeve në Gaza do të prekë të gjithë sektorët e luftimeve”.
“Ne po përgatitemi për çdo mundësi, ushtarake dhe politike”, tha Gallant.
Deklarata shtoi se Gallant dhe Hochstein diskutuan për përshkallëzimin e konfliktit në kufirin Izrael-Liban.
