Kompanitë kineze të veturave i kanë bërë thirrje Pekinit që të “godasë” rivalët e BE-së me taksa importi deri në 25 për qind, nëse blloku vendos tarifa për automjetet nga Kina.
Kërkesa thuhet se është bërë në një takim me dyer të mbyllura të organizuar nga Ministria kineze e Tregtisë, ku morën pjesë edhe përfaqësues të kompanive evropiane.
Bëhet e ditur se ky hap vjen pasi së fundmi BE-ja ka kërcënuar prodhuesit kinezë të automjeteve elektrike me tarifa deri në 38 për qind, duke filluar nga 4 korriku.
Ndërkohë, i pranishëm në takim konfirmohet të ketë qenë edhe gjiganti gjerman Volkswagen, i cili nuk ka pranuar të komentojë mbi atë që u diskutua.
Edhe kompanitë e tjera evropiane që thuhet se ishin të pranishme, duke përfshirë BMW dhe Porsche, nuk kanë pranuar të flasin mbi takimin, shkruan BBC.
Mirëpo, sipas një raporti, sugjerohet që Kina do të vendosë një tarifë të përkohshme të lartë për automjetet me benzinë të importuara nga Evropa.
Ky raport i bën jehonë një artikulli të botuar muajin e kaluar nga Global Times, i cili tha se tarifat 25 për qind duhet të zbatohen për vetura me motorë më të mëdhenj se 2.5 litërsh.
Ndryshe, Komisioni Evropian qeverisës i BE-së (KE) njoftoi se “prodhuesit kinezë të EV do të përballen me tarifa nëse diskutimet me autoritetet kineze nuk çojnë në një zgjidhje efektive”.
Siç raportohet, këto tarifa do të vendosen në krye të tarifës aktuale prej 10 për qind të vendosur për të gjitha veturat elektrike të prodhuara në Kinë.
Ndërhyrja e BE-së vjen pasi SHBA-ja bëri një lëvizje shumë më të guximshme për rritjen e tarifave të saj për veturat elektrike kineze nga 25 për qind në 100 për qind muajin e kaluar.
Qeveria kineze i ka denoncuar vendimet dhe që atëherë ka filluar të marrë masa. Në fillim të kësaj jave, Kina nisi një hetim për importet e produkteve evropiane të derrit.
