Kanadaja ka listuar Korpusin e Gardës Revolucionare Islamike të Iranit (IRGC) si një organizatë terroriste, pas vitesh presioni nga ligjvënësit e opozitës dhe disa anëtarë të diasporës iraniane.
Duke shpallur vendimin të mërkurën, Ministri i Sigurisë Publike Dominic LeBlanc e quajti atë një “mjet të rëndësishëm në luftën kundër terrorizmit global”. Ky veprim nënkupton që mijëra zyrtarë të lartë të qeverisë iraniane, duke përfshirë zyrtarë të lartë të IRGC, do të ndalohen të hyjnë në Kanada.
IRGC është një forcë e madhe ushtarake, politike dhe ekonomike në Iran, me lidhje të ngushta me Udhëheqësin Suprem, Ayatollah Ali Khamenei. Vlerësohet të ketë më shumë se 190,000 personel aktiv me forcat e veta tokësore, marinën dhe forcat ajrore që mbikëqyrin armët strategjike të Iranit.
Forca Quds tashmë ishte e listuar si një grup terrorist nga Kanadaja, por njoftimi i së mërkurës e shtrin përcaktimin në të gjithë IRGC-në.
Duke folur për gazetarët, LeBlanc tha se veprimi “dërgon një mesazh të fortë se Kanadaja do të përdorë të gjitha mjetet në dispozicion për të luftuar entitetin terrorist të IRGC”.
“Regjimi iranian ka shfaqur vazhdimisht shpërfillje për të drejtat e njeriut, si brenda ashtu edhe jashtë Iranit, si dhe një gatishmëri për të destabilizuar rendin e bazuar në rregulla ndërkombëtare,” tha ai.
Pas këtij përcaktimi, zyrtarët aktualë dhe ish-zyrtarë të lartë të qeverisë iraniane tashmë në Kanada mund të hetohen dhe largohen.
Ministrja e Punëve të Jashtme të Kanadasë, Melanie Joly, paralajmëroi se kanadezët në Iran mund të jenë në rrezik të ndalimit arbitrar pas njoftimit.
“Mesazhi im është i qartë: për ata që janë në Iran tani, është koha të kthehen në shtëpi. Dhe për ata që planifikojnë të shkojnë në Iran, mos shkoni.”, tha ajo.
