Numri i njerëzve të lindur jashtë vendit që jetojnë në Shtetet e Bashkuara u rrit me 15 për qind nga viti 2010 në 2022, në pak më shumë se 46 milionë, pavarësisht rritjes së ngadaltë të popullsisë, sipas Byrosë së Regjistrimit të SHBA-së.
Demografi William Frey, një bashkëpunëtor i lartë në Institutin Brookings, tha se kjo rritje nuk ishte aq e madhe sikur në disa dekada të mëparshme, veçanërisht nga viti 1990-2000.
Ndërmjet 1990 dhe 2000, numri i banorëve të huaj të lindur në SHBA u rrit nga 19 milionë në 31 milionë, një rritje prej 12 milionë. Në të kundërt, i njëjti grup u rrit me vetëm 6.2 milionë, nga 40 milionë në 46.2 milionë gjatë periudhës 2010-2022. Frey thotë se ka disa faktorë kryesorë pas ngadalësimit.
“Administrata Trump ka reduktuar disa nga nivelet e imigracionit me aspekte të ndryshme të politikave të tyre, dhe më pas, sigurisht, ka pandeminë. Por më pas, në fund të kësaj periudhe, rritja filloi përsëri. Ne nuk do ta shohim pjesën më të madhe deri vitin e ardhshëm kur të dalin raportet e reja”, tha Frey.
Pavarësisht indikacioneve të hershme se popullsia emigrante u rrit me një ritëm më të shpejtë më 2023, Frey pret një rritje më të ngadaltë në vijim sidomos te popullata e re.
“Në mënyrë që të përmirësojmë fuqinë punëtore, ne duhet të rrisim emigracionin tonë. Është një çështje shumë politike, por mendoj se një mënyrë e arsyeshme ekonomike për ta parë do të ishte të sigurohemi që ne të vazhdojmë të kemi nivele të arsyeshme imigrimi," tha Frey.
Numrat e regjistrimit tregojnë se arritja arsimore e njerëzve të lindur jashtë që jetojnë në SHBA është në rritje. Në vitin 2010, 68 për qind e personave të këtij grupi përfunduan shkollën e mesme ose arsimin e lartë, ndërsa në vitin 2022 ky numër u rrit në 75 për qind.
Në shtetet me më shumë emigrantë, Kaliforni (26.5%), Nju Xhersi (23.2%), Nju Jork (22.6%) dhe Florida (21.1%), të lindurit e huaj përbëjnë mbi një të pestën e popullsisë.
