Lista e pritjes për pacientët që kanë nevojë për ekzaminime me rezonancë magnetike, është rishikuar dhe shkurtuar në një muaj e gjysmë nga 13 muaj sa ishte para dy viteve.
Kështu ka deklaruar drejtoresha e Radiologjisë në Qendrën Klinike Universitare të Kosovës (QKUK), Shkëndije Nuza.
Ajo ka thënë se si Klinikë janë duke u ballafaquar edhe me aparatura të vjetra të cilat kanë pasur edhe defekte, që sipas saj, tani më janë rregulluar.
Nuza ka thënë se për pacientët që kanë nevojë për ekzaminime me ultrazë lista e pritjes është deri në tri javë, ndërsa ekzaminimet me CT, lista e pritjes është deri në dy javë.
“Duhet të kemi të qartë përveç pacienteve spitalor as një herë nuk presin, ekzaminimet me rëngën pacientët as një herë nuk ka ekzistuar listë e pritjes, ekzaminimet me ultrazë listën e pritjes e kemi diku brenda dy deri në tri javë, për arsye se kërkesat janë të vazhdueshme edhe kërkesa shumë të mëdha kemi edhe prej mjekësisë primare. Ekzaminimet me CT, dihet se Klinika e Radiologjisë punon me tre aparate të CT-së, tri janë para dite, ndërsa dy janë 24 ore, njëra pranë spitalit të fëmijëve, dhe CT-ja e emergjencës që punon 24 orë, lista e pritjes për CT është dy javë. Listë të pritjes, nëse do ta quajmë listë të pritjes për krahasim me listat e pritjes së përparme me rezonancë magnetike për rastet e ftohta, për rastet që presin është fundi i muajit korrik. Do të thotë është një muaj e gjysme, lista e pritjes për ekzaminime me rezonancë magnetike për rastet e ftohta. Ndërsa për rastet onkologjike gjithmonë siç e kemi cekur edhe më herët planifikohen sipas kërkesave të onkologut, do të thotë nëse onkologu dëshiron që kjo të bëhet pas dy jave do ti krijohet hapësira, nëse e kërkon pas tre muajve ne duhet të krijojmë një listë të re, listat e pacienteve onkologjikë janë lista të planifikuara. Për rastet emergjente punon 24 orë rezonanca magnetike”.
