Me rastin e Ditës së Pavarësisë së Izraelit, u theksua se nënshkrimi i marrëveshjes për heqjen e vizave me Kosovën shënon një moment të rëndësishëm historik, duke simbolizuar lidhjen në rritje midis dy shteteve.
Ambasadorja e Izraelit në Prishtinë, Tamar Ziv, tha se kjo marrëveshje jo vetëm që lehtëson udhëtimin dhe forcon lidhjet personale dhe të biznesit, por gjithashtu pasqyron përkushtimin e përbashkët për të nxitur lidhjet dhe bashkëpunimin më të ngushtë.
Përvec kësaj, Ziv potencoi se marrëveshja për heqjen e vizave do të hapë dyert për bashkëpunim në fusha të ndryshme, duke përfshirë teknologjinë, arsimin, kulturën dhe turizmin.
Ziv: Nënshkrimi i marrëveshjes për heqjen e vizave shënon një moment të rëndësishëm historik
“Kjo marrëveshje është ajo që lehtëson zhvillimin e marrëdhënieve mes nesh. Nënshkrimi i marrëveshjes për heqjen e vizave shënon një moment të rëndësishëm historik, duke simbolizuar lidhjen në rritje midis dy shteteve tona. Kjo marrëveshje jo vetëm që lehtëson udhëtimin dhe forcon lidhjet personale dhe të biznesit, por gjithashtu pasqyron përkushtimin tonë të përbashkët për të nxitur lidhjet dhe bashkëpunimin më të ngushtë. Marrëveshja për heqjen e vizave do të hapë dyert për bashkëpunim në fusha të ndryshme, duke përfshirë teknologjinë, arsimin, kulturën dhe turizmin. Marrëveshja do t'ua mundësojë njerëzve tanë të eksplorojnë vendet e njëri-tjetrit, të shkëmbejnë përvoja dhe të ndërtojnë miqësi të qëndrueshme. Ky partneritet nënkupton një hap përpara në hapjen e rrugës për bashkëpunim më të madh dhe përfitim të dyanshëm. Uroj që partneriteti ynë të forcohet edhe më tej dhe që lidhjet ndërmjet Izraelit dhe Kosovës të vazhdojnë të lulëzojnë”, u shpreh Ziv.
Po ashtu, Ministri i Brendshëm i Izraelit, Moshe Arbel tha se marrëdhëniet ndërmjet Izraelit dhe Kosovës janë zhvilluar në mënyrë mbresëlënëse në tre vjetët e fundit të cilat përfshijnë zhvillimin e bashkëpunimit në fushat e inovacionit, shëndetësisë, ekonomisë, kulturës, arsimit dhe fushave të tjera.
Ai shtoi se heqja e vizave do të jetë një tjetër pikë kthese në këtë marrëdhënie të veçantë dhe do të çojë në zhvillimin e mëtejshëm të marrëdhënieve turistike midis dy shteteve.
Arbel:Kjo marrëveshje është një dëshmi e mëtejshme e forcimit të lidhjeve midis shteteve tona
“Kjo marrëveshje është një dëshmi e mëtejshme e forcimit të lidhjeve midis shteteve tona dhe angazhimit tonë të përbashkët për të nxitur bashkëpunimin dhe miqësinë mes qytetarëve tanë, rreth tre vjet pas vendosjes së marrëdhënieve diplomatike mes vendeve tona. Marrëdhëniet ndërmjet Izraelit dhe Kosovës janë zhvilluar në mënyrë mbresëlënëse në tre vjetët e fundit dhe përfshijnë zhvillimin e bashkëpunimit në fushat e inovacionit, shëndetësisë, ekonomisë, kulturës, arsimit dhe fushave të tjera. Ne besojmë se heqja e vizave do të jetë një tjetër pikë kthese në këtë marrëdhënie të veçantë dhe do të çojë në zhvillimin e mëtejshëm të marrëdhënieve turistike midis shteteve tona. Gjithashtu, inkurajojmë qytetarët e Izraelit që të vizitojnë Kosovën dhe të zbulojnë peizazhet e saj të bukura, kulturën e saj të pasur dhe ngrohtësinë dhe mikpritjen e banorëve të saj. Përpjekja për të lehtësuar udhëtimin ndërmjet qytetarëve të shteteve tona është vetëm një pjesë e ambicies më të gjerë për të thelluar lidhjet mes qytetarëve tanë”, tha Arbel.
Ndërkaq, Ministrja e Punëve të Jashtme, Donika Gërvalla Schwarz shprehu krenari dhe gëzim që Izraeli dhe Kosova kanë vendosur marrëdhënie diplomatike, për çka potencoi se ishte privilegj nënshkrimi i marrëveshjes dypalëshe për udhëtimin pa viza ndërmjet dy vendeve.
Ajo theksoi se kjo marrëveshje është një arritje e madhe që shënon një epokë të re në bashkëpunimin ndërmjet Kosovës dhe Izraelit.
Gërvalla-Schwarz: Jemi krenarë dhe të gëzuar që Izraeli dhe Kosova kanë vendosur marrëdhënie diplomatike
“76 vjet pas shpalljes së pavarësisë, Izraeli ka arritur shumë suksese të jashtëzakonshme në një sërë fushash nga teknologjia në shkencë, te arti dhe kultura. Fillimi i Republikës së Kosovës nuk është i krahasueshëm me fillimin e Shtetit të Izraelit, por edhe shteti i Kosovës ka lindur nga gjenocidi, dhe ai gjenocid është bërë ndaj një populli që nuk ka sulmuar por është sulmuar në radhë të parë. Republika e Kosovës pajtohet me vlerësimin e Bashkimit Evropian dhe Shteteve të Bashkuara se Hamasi është një organizatë terroriste që duhet të çmontohet dhe mposhtet. Në të njëjtën kohë, ne vërtet shpresojmë se paqja mund të rivendoset sa më shpejt që të jetë e mundur, dhe pastaj rruga e pajtimit do të vazhdojë. Natyrisht, ne jemi krenarë dhe të gëzuar që Izraeli dhe Kosova kanë vendosur marrëdhënie diplomatike…Ishte një privilegj të nënshkruajmë sot marrëveshjen tonë dypalëshe për udhëtimin pa viza ndërmjet dy vendeve tona. Kjo marrëveshje është një arritje e madhe që shënon një epokë të re në bashkëpunimin tonë. Ky hap do të lehtësojë lëvizjen e lirë të qytetarëve tanë, do të forcojë lidhjet midis dy vendeve tona dhe do të forcojë bazën për shkëmbimet kulturore, ekonomike dhe sociale, që do t'i afrojë njerëzit tanë dhe mund dhe duhet të hapë mundësi të reja edhe për bizneset”, tha Gërvalla.
Ndërkaq, sot gjatë ditës nënshkrimin e marrëveshjes ndërshtetërore për heqjen e vizave e kanë bërë ministrja e Punëve të Jashtme dhe Diasporës, Donika Gërvalla dhe ministri i Brendshëm i Izraelit, Moshe Arbel.
Kësisoj, Izraeli bëhet shteti i 50-të që mundëson lëvizjen e lirë për qytetarët e Kosovës. Marrëveshja do të fillojë së zbatuari nga 19 shtatori i këtij viti.
