Aziz Salihut iu bë zemra mal në spitalin e Stambollit, kur dëgjoi se Majlinda Kelmendi është kampione olimpike! Ish boksieri i mirënjohur, ‘Zizi’, fitues i medaljes së bronztë olimpike në Los Anxhelos në vitin 1984, gati sa kishte fluturuar nga gëzimi kur kuptoi se xhudistja Majlinda është fituese e medaljes së artë dhe për një moment kishte harruar të gjitha peripecitë, se ai e di se çka do të thotë të jesh medalist olimpik. Kampionia olimpike, Majlinda Kelmendi dhe përzgjedhësi i kombëtares së Kosovës, Driton Kuka, kanë një mesazh emocionues për ‘Zizin’. Majlinda e Dritoni nga Rio flasin ekskluzivisht për gazetën kombëtare “Bota sot”, duke iu drejtuar me një mesazh ‘Zizit’. “Lutemi për shëndetin e tij. Çdo ditë kemi biseduar me dëshirë për shërim sa ma të shpejtë”, tha Kuka. Njerëzit e mëdhenj si Majlinda e Kuka nuk e harrojnë dot ‘Zizin’ sepse siç thonë ai ka qenë gjithmonë një frymëzim i madh për ta. Medaljen olimpike ia dedikojnë ‘Zizit’. “Medalja i dedikohet ‘Zizit’ për shërim sa më të shpejt’, thotë Kuka.