Toshiba ka njoftuar se përdoruesit e saj individual dhe ata të biznesit së shpejti do të mund ta blejnë tabletin e konvertueshëm në laptop, përkatësisht modelin Toshiba Satellite Radius 11, që do të jetë në dispozicion në treg duke filluar nga data 26 tetor, për një kosto mjaft të përballueshme që nuk e tejkalon shumën prej 330 dollarëve.
Satellite Radius 11 konvertohet në laptop, i cili mbështetet në procesorin e Intel Celeron apo Pentium me 4GB RAM dhe opsionet e memories prej 32GB “flash storage” apo 500GB hard disk.
Toshiba gjithashtu e ka përshtatur edhe kamerën e përparme në kualitetin HD, ndërsa pajisja bazohet në versionin e fundit të sistemit operativ të Microsoft, Windows 8.1, që mund të përdoret në disa formate, duke përfshirë: laptop, tablet, tabletop, prezantime dhe audience.
Toshiba Satellite Radius 11 sjell edhe ekranin me diagonalen prej 11.6” me rezolucion prej 1366 x 768 pikselëve, dhe rrotullim në 360 shkallë, ndërsa në të ofrohen edhe portet për USB 3.0 dhe USB 2.0, SD kartelë për zgjerim të hapësirës, dhe HDMI.
