Atlas, i gjatë 187 centimetra, është një prej robotëve konkurrues në një garë të krijuar nga Departamenti amerikan i Mbrojtjes për të prodhuar një robot jetëshpëtues në formë njeriu
Sekretari amerikan i Mbrojtjes, Chuck Hagel, e ka inspektuar nga afër një robot që i ngjason Terminatorit të Hollivudit dhe përbën eksperimentin më të fundit të shkencëtarëve të Pentagonit.
Por, për dallim prej versionit kinematik, roboti i madh Atlas nuk është i dizajnuar si luftëtar, por si një makinë humanitare e cila do të shpëtonte viktima në rrënojat e ndonjë katastrofe natyrore.
Atlas, i gjatë 187 centimetra, është një prej robotëve konkurrues në një garë të krijuar për të prodhuar një makinë jetëshpëtuese si një njeri, i krijuar nga Agjencia e Projekteve të Avancuara Hulumtuese të Mbrojtjes (DARPA). Gara, e cila do të kërkojë që robotët të qarkullojnë nëpër terrene të vështira dhe të hyjnë në ndërtesa, është hapur pas katastrofës së Fukushimës në Japoni.
DARPA, krahu hulumtues i Pentagonit, i njohur për projekte futuriste që duken si të jenë nxjerrë nga filmat fantastiko-shkencorë të Hollivudit, ia ka treguar Hagelit robotin Atlas, por përveç dritave të tij LED, roboti humanoid është dukur të ketë qenë i fikur në një ekspozim “statik”.
Brad Tousley, shef i Zyrës së Teknologjisë Taktike të DARPA-s, i ka thënë Hagelit se Hollivudi ka krijuar perceptime jorealiste të asaj që mund të bëjnë robotët. Sipas tij, ndërtimi i robotëve që mund të çelin dyer dhe të bartin gjëra kërkon shkathtësi të mëdha inxhinierike dhe kompjuterike.
Shkencëtarët gjithashtu i kanë treguar Hagelit teknologjinë e fundit të protezave, përfshirë një dorë që i përgjigjet impulseve trunore, si dhe një krah që kontrollohet nga lëvizjet e këmbëve.
Menaxherët e DARPA-s i kanë treguar Hagelit edhe teknologji të tjera, mirëpo gazetarët janë detyruar të largohen pas tri demonstrimeve të para, për shkak të ruajtjes së sekreteve ushtarake.
