Liqeni i Ohrit ka arritur lartësinë e dytë maksimale prej 694 metra mbi nivelin e detit dhe është e mundshme dalja nga shtrati i liqenit apo përmbytje.
Liqeni i Ohrit ka arritur lartësinë e dytë maksimale prej 694 metra mbi nivelin e detit dhe është e mundshme dalja nga shtrati i liqenit apo përmbytje.
Kjo më shumë do të vërehet në pjesën e bregut të liqenit të Ohrit dhe Strugës, por edhe nga rrjedha e lumit Drini i Zi.
“Për shkak të erës jugore, mund të ndodhë në anën e Pogradecit të tërhiqet linja e bregut deri në 10 metra, ndërsa këtu të rritet më shumë se 50 centimetra. Është e pamundur të parashikohet skenari, por nëse shfaqet erë jugore, Ohri është pjesa më kritike, edhe atë nga porti deri tek Kaneo, ndërsa më tej drejt plazhit të qytetit, sepse linja e bregut atje është shumë më e ulët. Nëse ka një rritje më ekstreme të nivelit, problemet do të jenë edhe në drejtim të qytetit të Strugës – deklaroi Aleksandar Angjeloski- hidrolog, për Alsat M.
Angjeloski bën thirrje për koordinim më të madh mes institucioneve shtetërore dhe atyre lokale. Në këtë periudhë kritike thotë se është e nevojshme të bëhet matje e sasisë së ujit për çdo ditë në të gjithë lumenjtë që rrjedhin në liqen.
“Është e rëndësishme të kemi pasqyrë në rrjedhën e ujit, gjegjësisht sa sasi e ujit derdhet në liqen dhe se si mund të koordinohet edhe derdhja e ujit përmes Drinit të Zi, sepse atje kemi probleme me mosmirëmbajtjen e shtratit të lumit”, shtoi ai.
Era që frynte mbrëmë në Ohër në disa vende përsëri shkaktoi probleme. Nën ujë ishte një pjesë e bregut të qytetit dhe disa nga plazhet në bregun perëndimor. Hotelierët thonë se për këtë fundjavë janë përgatitur për një erë të re të fortë si ajo para dhjetë ditësh.