Korça është shkundur nga akuzat pa fund drejtuar Skënderbeut. Një reagim që ka ardhur në mënyrën e duhur ndoshta, ajo që pritej prej kohësh të ndodhte. Fitorja në Kamzë, por mbi të gjitha akuzat e rënda që kanë kohë që e godasin ekipin e Skënderbeut, kanë prishur gjumin e çdo korçari jo vetëm tifoz, por edhe sportdashës.
Në një situatë të tillë, zëri qytetar është bërë bashkë dhe do të ngrihet më i fortë ditën e mërkurë, në orën 13:30, te sheshi para Katedrales së qytetit në një tubim paqësor. Ka qenë qytetaria korçare ajo që ka organizuar gjithçka dhe është bërë gati çdo gjë që tubimi të shkojë ashtu i qetë dhe paqësor.
Organizatorët, mes të cilëve intelektualë, pedagogë dhe figura të respektuara në qytetin juglindor, kanë bërë gjithç- ka gati, duke filluar nga kërkesa në polici për organizimin e këtij tubimi e deri në njoftimin pranë bashkisë që çdo gjë të jetë e ligjshme. Mesazhi i qartë i këtij tubimi paqësor është i thjeshtë: “Një qytet i tërë jeton me futbollin, një qytet i tërë dashuron Skënderbeun”.
Për ta Skënderbeu nuk është thjesht një emblemë, është një histori e tërë lavdie dhe krenarie. Pikërisht përmes këtij mesazhi ata duan t’i bëjnë thirrje UEFA-s që të mos dënojë ekipin e tyre, pasi në këtë mënyrë do të fundosnin një qytet të tërë. Skënderbeu nuk është thjesht një ekip futbolli për ta, por gjithë jeta. Dhe një thirrje e tillë vjen pikërisht në përvjetorin mbarëkombëtar të vitit të Skënderbeut, heroi ynë kombëtar.
Tubimi pritet që të zgjasë më shumë se 30 minuta dhe, në fund, do të hidhen të gjitha firmat në një letër që do t’i dërgohet UEFA-s. Të gjithë qytetarët korçarë, intelektualët do të jenë të pranishëm në këtë tubim për të kërkuar dhe provuar pafajësinë e Skënderbeut, pasi një histori e gjithë nuk mund të dënohet vetëm me akuza të pafaktuara.
