Mërgim Mavraj pak nga pak po e hedh pas krahëve dëmtimin e rëndë që pësoi në fund të sezonit të kaluar dhe mund ti rikthehet shumë shpejtë seancave stërvitore.
Mbrojtësi i kombëtares shqiptare dhe i skuadrës së Kolnit në Bundesligën e parë gjermane tashmë ecën pa paterica dhe pas 6 javëve shumë të sikletshme për të mund ti rikthehet fushave të futbollit, edhe pse për ta parë sërish Mavrajn të luajë një ndeshje duhet ende edhe pak kohë.
Për 29-vjecarin ka sërish shpresë pas atij dëmtimi të rëndë në gjurin e djathtë, që për ta lënë pas iu nënshtrua dhe një operacioni në fillimin e muajit Qershor, transmeton Supersport.al.
I intervistuar nga gazeta gjermane Bild, Mavraj tregoi sesi po shkon faza e riaftësimit duke u shfaqur optimist mbi shanset e tij për tu rikthyer në fushat e blerta në një kohë shumë të shkurtër.
"Ndihem shumë mirë", deklaroi ish mbrojtësi i Greuther Furth për Bild. "Kam ende pak dhimbje dhe nuk mund ti kryej plotësisht të gjitha ushtrimet që mund të më ndihmojnë për rikuperimin e plotë por kam ndjesi pozitive se gjërat do të shkojnë shumë mirë për mua", shtoi në vijim Mavraj.
I pyetur për rikthimin e tij në fushë 29-vjecari nuk dha një përgjigje ekzakte, por nënvizoi se mjekët janë besim plotë dhe ai po punon nga 5 deri në 6 orë në ditë për të lënë pas dëmtimin.
Mërgim Mavraj është një nga futbollistët më të rëndësishëm të kombëtares kuqezi, dhe mungesa e tij në dy ndeshjet elimintore të muajit Shtator që Shqipëria do të zhvillojë ndaj Danimarkës dhe Portugalisë do të ishte një minus i madh për skuadrën e drejtuar nga Gianni De Biasi.
Trajnerit italian nuk i mbetet gjë tjetër vecse të kryqëzojë gishtat që Mavraj të riaftësohet në kohë për këto dy takime edhe pse gjasat që dicka e tillë të ndodhë nuk janë shumë të mëdha.
