Për të dytën ditë radhazi Partizani e zhvilloi seancën stërvitore në terrenin e shkëlqyer të “Qemal Stafës”, aty ku të enjten në mbrëmje i mbështetur nga tifozëria e zjarrtë, do të kërkojë pëmbysjen e madhe ndaj norvegjezëve të Stromsgodset, që vijnë në Tiranë me avantazhin e rezultatit të parë. Shifrat 3-1 sigurisht që bëjnë favorit kundërshtarin e Partizanit, por në kampin e kuq besojnë te mrekullia. Tifozët e Partizanit presin me ankth të mësojnë formacionin titullar të Starovës, që në transfertën e Dramen, nuk aktivizoi për asnjë minutë Nexhipin dhe Mazrekajn, ndërsa gjatë lojës humbi për arsye dëmtimi Alban Hoxhën.
Portieri 27-vjecar po bën të pamundurën për të qenë në dispozicion të trajnerit, duke u stërvitur i diferencuar nga pjesa e tjetër e grupit nën kujdesin e fizioterapistit, ndërsa mbrojtësi Labinot Ibrahimi qëndroi gjatë gjithë kohës në stol pasi ditët e fundit ka patur probleme shëndetësore. Por si po e përgatit Starova përballjen e dytë me Stromgodset? Në kushtet klimaterike aspak të favorshme për norvegjezët dhe me mbështetjen e madhe të publikut, tekniku 59-vjecar pritet të hedhë në fushë një formacion sulmues me rreshtimin 4-3-3.
Në portë, nëse Hoxha nuk riaftësohet në kohë, do të luajë Xhika, ndërsa mbrojtja do të formohet nga Fejzullahu e Kalari nga krahët, me dyshen Vrapi-Bicaj në qendër. Në mesfushë përkrah Bathës do të rreshtohen Vila dhe Mazrekaj, ndërsa në sulm, Racic do të mbështetet nga Plaku dhe Fazliu. Starova sërish nuk është i bindur për të aktivizuar titullar Nexhipin, kontributi i të cilit mund të nevojitet me kalimin e minutave dhe në varësi të rezultatit. Seancën e fundit stërvitore para ndeshjes me Stromsgodset të kuqtë do ta zhvillojnë në Pezë Helmës, pasi “Qemal Stafa” 24 orë para takimit do të jetë në dispozicion të norvegjezëve.
