Një lajm i pabesueshëm i afatit kalimtar vjen nga Anglia ku besojnë se Gareth Bale kërkon të rikthehet në Premier League. Edhe pse në Madrid, uellsiani po fiton gjithçka duke u bërë një nga lojtarët kyç të formacionit të Ancelottit, "Daily Express" këmbëngul se ish sulmuesi i Tottenham synon të rikthehet në ishull për të veshur fanellën e Manchester United. Lajmin e citon edhe madrilenia "AS", sipas së cilës, Van Gaal është gati të derdhë 100 milionë euro në arkën e "Los Blancos" për ta vendosur uellsianin nën urdhrat e tij. Më shumë se dëshira e lojtarit është ajo e teknikut holandez për ta marrë në "Old Trafford", pasi ai nuk është ende i kënaqur me grupin që ka në dispozicion edhe pse gjatë verës bëri disa shpenzime të çmendura në afatin kalimtar duke afruar Di Marian dhe Falcaon.
