Paraqitjet e tij të shkëlqyeshme me Kolumbinë në Kupën e Botës, por edhe transferimi i bujshëm te Reali i Madridit për plot 80 milionë euro në verë, kanë bërë që James Rodrigues të jetë sportisti më i kërkuar në internet për vitin 2014.
Përpara kampionatit botëror që u zhvillua në Brazil nga data 12 qershor deri më 13 korrik, 23-vjeçari kolumbian njihej shumë pak pavarësisht se vetëm pak kohë parë Monaco kishte derdhur në arkat e Portos , 45 milionë euro për të marrë shërbimet e tij.
Në klasifikimin special të publikuar nga kompania “Google”, James Rodrigues lë pas 7-herë kampionin e botës në Formula 1, Michael Schumacher për sa i përket sportistëve më të kërkuar në internet për vitin 2014. Menjëherë pas ish ngasësit gjerman pozicionohet lojtari i Baltimore Ravens në National Football League të Shteteve të Bashkuara të Amerikës, Ray Rice i cili në 2014-n u përfshi në një skandal me të vërtetë të madh, pasi u kap nga kamerat e sigurisë se kishte goditur me grusht të fejuarën e tij Janay Palmer në ashensorin e një hoteli.
Jashtë podit Luis Suarez. Edhe pse ky i fundit u bë protagonist në Kupën e Botës me kafshimin ndaj italianit Giorgio Chielini, emri i tij është i 4-ti më i klikuar në motorin e kërkimit Google për vitin 2014. Goli që shënoi në finalen e Kupës së Botës ndaj Argjentinës ka bërë që Mario Gotze të pozicionohet i pesti në këtë klasifikimin special.
Pas talentit të kombëtares gjermane vjen ngasësi francez i Formula 1, Jules Bianchi i cili u aksidentua rëndë në pistën e Suzukas. 10-shja e parë e sportistëve më të kërkuar në Google për vitin 2014 plotësohet me portierin e kombëtares meksikane Guillermo Ochoa që spikati jo pak me pritjet e tij në Kupën e Botës, ndërsa mbyllet me notarin Michael Phelps dhe lojtarin e Seattle Seahawks në NFL, Richard Sherman.
Kanë mbetur jashtë 10-shes së parë sa i përket sportistëve më të kërkuar në internet për vitin 2014, dy futbollistët që aktualisht janë më të mirët në botë, Cristiano Ronaldo dhe Lionel Messi.
