Ish-futbollisti i mirënjohur nga Kosova, Besnik Hasi, aktualisht trajner i kampionit belg, Anderlecht, tha se shorti është i mirë, por ekipet janë të vështira. Skuadra belge është në grupin D me Arsenalin, Dortmundin dhe Galatasarayn. Një grup i fortë, por jo edhe pakalueshëm. Hasi me punën e tij ka bërë një skuadër të fortë, ku e bëri kampion dhe fitues të Superkupës në Belgjikës. Hasi flet për përvojën e tij të parë në Champions League në cilësinë e trajnerit. “Duhet të jemi realist. Shorti duket i mirë, por kundërshtarët janë shumë të vështirë. E kisha shpresuar një grup me Chelsea, Schalke e Sportingun, por nuk ndodhi ashtu. Do të japim më të mirën dhe gjithsesi do të kemi një përvojë të mirë në grup”, ka thënë Hasi. Krahas Hasit si trajnerë pjesë e kësaj ngjarjeje të madhe janë edhe nëntë futbollistë shqiptarë. Xherdan Shaqiri që luan për Bayernin nga Munihu, Shkëlzen Gashi, Taulant Xhaka, Naser Aliji, Arlind e Albion Ajeti për kampionin zviceran, Baseli, Pajtim Kasami me Olympikosin , Agim Ibraimi (Maribori) dhe Agon Mehmeti (Malmo). Të gjithë shqiptarët shpresojnë në rezultate më mira, por Shaqiri me Bayernin janë favoritë të mëdhenj për të fituar edhe garën më prestigjioze.
