Paqe në sfidën e miqve. Kukësi dhe Trepça 89 barazuan 1-1 mes tyre në takimin miqësor të luajtur në qytetin verilindor në vazhdën e organizimeve të ndryshme në kujtim të eksodit kosovar të 15 viteve më parë, që nisi 16 prillin e 1999 me kalimin e kufirit të 75 mijë qytetarëve të Mitrovicës në pikën e Morinës. Në stadiumin “Zeqir Ymeri” nuk munguan pavarësisht kushteve të papërshtatshme atmosferike dhe tifozë të dy ekipeve, ku në një numër të konsiderueshëm ishin dhe ata të ardhur nga Mitrovica.
Sa i përket takimit, ekipi xehetar i Trepça 89 kaloi fillimisht në avantazh me një gol të Jetullahut në minutën e 10-të, ndërsa në pjesën e dytë për kuksianët barazoi Gerhard Progni. Gjithashtu në vazhdën e aktiviteteve përkujtimore, presidenti i Kukësit, zoti Safet Gjici i dhuroi kryeministrit shqiptar, Edi Rama dhe atij kosovar, Hashim Thaci dhe nga një fanellë të ekipit verilindor me emrat përkatës dhe numrin 10 mbi të.