Atletja 18-vjeçare e kombëtares së Kosovës, Vijona Kryeziu, nuk arriti të kualifikohet në gjysmëfinalen e Kampionatit Evropian, që ka filluar dje në Amsterdam të Holandës. Vijona pati paraqitje të mirë në disiplinën 400 metra. “Vijona vrapoj në 400 metra me rezultatin 56.04 sekonda. Rezultati më i mirë për këtë vit për Kosovë. Për herë të parë Kosova u paraqit në Kampionatin Evropian dhe ishte ditë historike për atletikën tonë. Vijona edhe pse nuk u kualifikua për në gjysmëfinale, ajo futet në histori, sepse është femra e parë që ka përfaqësuar Kosovën në atletikën evropiane”, tha për gazetën kombëtare “Bota sot” Abdurrahman Shkodra, sekretar i përgjithshëm i Federatës Atletike të Kosovës. Shkodra e arsyetojë Vijonën që nuk arriti të jetë në gjysmëfinale, duke thënë: “Duke i marr parasysh kushtet që ka Kosova dhe duke ditur qe dy vite shtegu që është në renovim në stadiumin ‘Adem Jashari’ në Mitrovicë, në pamundësi për të stërvitur e garuar aty, Vijona bëri një paraqitje të mirë në evropian”. Ndërkaq, atleti nga Shqipëria, Izmir Smajlaj, në kërcim së gjati ka prerë një biletë për në finale e kësaj disipline. Atleti shkodran ka bërë një paraqitje të shkëlqyer në bateritë eliminatore, duke kërcyer 7.92 metra, distancë e mjatueshme për të shkuar në finale. Sot do të garojë edhe atleti nga Kosova, Musa Hajdari në dispilinë 800 metra, i cili mëton rezultat të mirë. Hajdari sado kudo ka një përvojë në garat ndërkombëtare dhe do të orvatet që të arrijë një kohë sa më të mirë.