Superylli austriak, Marcel Hirscher, ka qenë fenomenal në garën e parë të skive alpike në Lojërat Olimpike Dimërore – Pyeongchang 2018 të Koresë së Jugut. Gara u zhvillua në Qendrën e skive Jeongseon, ku kampioni i gjashtëfishtë i botës u tregua i shkathët në shteg, duke zënë vendin e parë në kombinimin alpik me kohë të kaluar për 2:06,52 minuta. Hirscher rrëshqiti pothuajse i përsosur, duke arritur kohën më të mirë për 23 qindtat se francezi Alexis Pinturault.
Hirscher fiton medaljen e parë të artë në Lojërat Olimpike Dimërore pas 120 podiumeve në Kupën e Botës, 55 fitoreve dhe 6 titujve, pas 3 medaljeve të arta në Kampionatet Botërore dhe një të argjendtë në Olimpiadë. Hirscher është i lumtur për medaljen e artë olimpike, duke pretenduar të tjera. Pinturault fitoi medaljen e argjendtë, duke e pasur kohën shumë më të mirë se bashkëkombësi i tij, Victor Muffat-Jeandet. Pinturault ishte më i shpejt për 79 qindtat se vendi i tretë. Muffat-Jeandet stoliset me medalje të bronztë, një sukses i madh për të. Ndërkaq, austriaku Marco Schwarz ngeci për një sekondë e 35 qindtat nga vendi i parë, por ishte më i shpejt për 10 qindtat se i pesti, amerikani Ted Ligety.
Rezultatet
1. Marcel Hirscher (Austria) 2:06,52
2. Alexis Pinturault (Franca) +0,23
3. Victor Muffat-Jeandet (Franca) +1,02
4. Marco Schwarz (Austria) +1,35
5. Ted Ligety (SHBA) +1,45
6. Thomas Mermillod Blondin (Franca) +1,50
7. Kjetil Jansrud (Norvegjia) +2,15
8. Stefan Hadalin (Sllovenia) +2,42
9. Thomas Dressen (Gjermania) +2,44
10. Klemen Kosi (Sllovenia) +2,85