Kreu i Kuvendit, Gramoz Ruçi i ka dërguar një letër shkrimtarit të madh Ismail Kadare, pak ditë pasi ai mori çmimin e Karrierës së Akademisë së Shkencave të Shqipërisë për vitin 2017.
Në letrën e dërguar për të madhin Kadare, Ruçi vlerëson shkrimtarin për rolin dhe kontributin e madh, jo vetëm në historinë e letrave shqipe.
LETRA E PLOTË
Ismail Kadare
Tiranë
Shumë i nderuari zoti Kadare,
Përjetova me gëzim të veçantë shpalljen Tuaj si fituesi i Çmimit të Karierrës të Akademisë së Shkencave të Shqipërisë për vitin 2017.
Ky Çmim i shtohet gjerdanit të vlerësimeve e çmimeve për veprën Tuaj letrare dhe kontributin intelektual në Shqipëri, Europë dhe në globin mbarë.
Rrallë herë ndodh në kohën e sotme që krijimtaria e famshme letrare e njohur botërisht, kontributi intelektual plot finesë, vepra e thellë studimore e akademike, identiteti dhe vizioni europian, simbolet e vlerat kombëtare, dhe dedikimi shoqëror e qytetar të bashkohen në një individ të vetëm, si në rastin Tuaj. Ju jeni ngjitur në Olimpin e letrave dhe të shkencës dhe prej andej ndriçoni historinë, të sotmen dhe të ardhmen e shqiptarëve.
Letërsia, kultura dhe qytetërimi shqiptar janë sot të njohur sepse në to është skalitur emri Ismail Kadare.
Ju jeni ndër margaritarët e kombit dhe na bëni të ndihemi të gjithë krenar si bashkëkombësit, bashkëkohësit dhe lexuesit Tuaj.
Po Ju shkruaj me mirënjohje të pafund këtë letër si një ndër lexuesit dhe adhuruesit e panumërt të Veprës Tuaj.
Me respekt të thellë,
Gramoz Ruçi
Tiranë, 19 qershor 2018
