Ministri gjerman: Shqipëria ka mbështetjen tonë në rrugën europiane

Shqipëria

Ministri gjerman: Shqipëria ka mbështetjen tonë në rrugën europiane

Më: 12 maj 2018 Në ora: 15:58
Michael Roth

“Shqipëria mund të vazhdojë të mbështet në ndihmën dhe përkrahjen e Gjermanisë”, deklaroi sot në Tiranë ministri i Shtetit për Çështje Evropiane në Ministrinë e Jashtme gjermane Michael Roth.

Në një konferencë për shtyp pas takimit me ministrin e Jashtëm Ditmir Bushati, Roth theksoi se “rruga e Shqipërisë drejt Bashkimit Europian është e vështirë, por është një rrugë që në fund të fundit ia vlen dhe në vitet e kaluara Shqipëria ka shënuar një sërë arritjesh të rëndësishme. Në plan të parë janë arritjet që kanë të bëjnë me përforcimin e sistemit të demokracisë të shtetit ligjor të sistemit të drejtësisë dhe pavarësisë së tij”, nënvizoi ai.

“Qeveria federale është duke verifikuar të gjitha këto arritje dhe në bashkëpunim me Bundestagun do të pozicionohemi në të ardhmen për çeljen e këtyre negociatave. Argumentet për çeljen e negociatave sigurisht që nuk mungojnë, perspektiva e anëtarësimit për në BE për të gjitha vendet e Ballkanit Perëndimor, dhe veçanërisht për Shqipërinë, është në interesin jo vetëm të Shqipërisë dhe shqiptarëve, por dhe në interesin tonë dhe ne duhet tua shpjegojmë këtë qytetarëve tanë”, theksoi Roth.

Duke folur për vetting-un, Roth theksoi se “procesi i vetting-ut është unik nga karakteri dhe shërben si model për vendet e Ballkanit Perëndimor.

Gjatë takimeve në Tiranë, bisedova me përfaqësues të organeve të vendit dhe ekspertë ndërkombëtarë në këtë fushë. Ata më informuan që ky proces ka filluar të japë rezultatet e veta”, u shpreh Ruth.

Ministri gjerman tha se “lidhur me këtë teme bisedova edhe me kryeministrin Edi Rama dhe ministrin e Brendshëm Fatmir Xhafa, ku fokusi i bisedave kanë qenë problematikat lidhur me luftën kundër korrupsionit, terrorizmit, fusha që ne kemi ende pritshmëri për suksese të mëtejshme”.

“KE ka dhënë rekomandimin për çeljen e negociatave për anëtarësimin e vendit tuaj, tashmë po konfirmon këto arritje. Argumentet për çeljen e negociatave nuk mungojnë, perspektiva e Ballkanit Perëndimor për Shqipërinë në BE është edhe në interesin tonë”, nënvizoi Roth.

Ai vlerësoi të gjithë qytetarët e Shqipërisë për të gjitha ato që kanë bërë nëpërmjet përpjekjeve për të qenë pjesë e BE-së.

“Ne duhet të bëjmë përpjekje të mëtejshme për të ofruar mundësi punësimi për brezat e rinj, që janë të domosdoshëm për vendet evropiane. Duhet një administratë profesionale, një sistem drejtësie i pa korruptuar. Pres nga qeveria të vijojë zbatimin e reformave në mënyrë konsekuente”, shtoi ai.

Roth: Opozita të marrë përgjegjësitë e veta për të kontribuar në të gjitha proceset

Ministri gjerman theksoi se “pres dhe nga opozita të ndërmarrë përgjegjësitë e veta për të kontribuar në të gjitha këto procese. Dje bisedova me Bashën, ishte një bisedë mjaft e mirë. Sado që mund të ekzistojnë konflikte në politikat e brendshme, çka është shenjë e një sistemi demokratik të gjallë, gjithsesi duhet të lini mënjanë ndasitë për të ecur para”.

Por, Roth këshilloi klasën politike shqiptare që në momentin e çeljes së negociatave përfaqësues të shoqërisë civile të përfshihen në këtë proces, të gjithë ta ndjejnë këtë proces si një udhëtim të përbashkët.

Bushati: Besojmë te mbështetja e Gjermanisë

Ndërsa ministri Bushati Bushati tha se në fokus të bisedës ishin hapat që duhet të ndërmarrë Shqipëria në procesin e integrimit.

“Gjermania është kritikë e rreptë, por edhe partnere sa i përket procesit të anëtarësimit. Siç mund ta merrni me mend fokusi kryesor i bisedës ishte në lidhje me hapat e mëtejshëm që duhet të ndërmarrim në procesin e anëtarësimit në BE, duke marrë në shqyrtim qoftë procesin e reformave që ka ndërmarrë Shqipëria, rekomandimin e Komisionit Europian për fillimin e bisedimeve për anëtarësim, strategjinë e zgjerimit, e cila përcakton disa prej fushave kryesore ku do të përqendrohet bashkëpunimi i vendeve të Ballkanit Perëndimor dhe bashkëpunimi i BE-së me vendet e Ballkanit perëndimor në të ardhmen”, theksoi Bushati.

Ministri Bushati u shpreh se “dy janë elementët thelbësore të hapave që duhen ndjekur, ritmi i reformave dhe thellimi i tyre”.

“Kemi dëgjuar me durim edhe hapat që duhen bërë në vijim, sepse siç e ka thënë disa herë kryeministri Rama që ditën e dorëzimit të raportit të KE, gjatë vizitës së përfaqësueses së politikës së Jashtme të BE, Mogherini e deri në ditën e sotme dy janë elementët thelbësore që shoqërojnë procesin rekomandimit për nisjen e bisedimeve për anëtarësim, nevoja për të mbajtur ritmin e reformave dhe për t’i thelluar më tej këto reforma, sepse këto nuk janë reforma që bëhen për Brukselin, Berlinin, Parisin apo Hagën, por janë reforma përmes së cilave shoqëria shqiptare vijon të zhvillohet dhe transformohet”, theksoi Bushati.

Bushati tha se “…kemi besim që Gjermania është një partner që ka një lexim shumë të qarët qoftë për arritjet që kemi, ashtu edhe për atë se çfarë duhet të bëjmë më mirë dhe besojmë fuqimisht në mbështetjen e fuqishme të saj në procesin e vështirë për nisjen e bisedimeve për anëtarësim”, u shpreh ministri Bushati.ATA

commentFirst article
Sot mund të lexoni Shfletoni kopertinat