Këshilli i Ministrave ka vendosur që një fond prej 20 milionë lekësh nga Ministria e Bujqësisë t’i shkojë Ministrisë së Mbrojtjes në ndihmë dhe asistencë të qytetarëve të prekur nga përmbytjet në Shkodër.
20 milionë lekët që kanë dalë nga Ministria e Bujqësisë ishin në fakt të programuara për t’u përdorur në programin buxhetor për mbështetjen e prodhimit bujqësor e blegtoral, por tanimë do të kalojnë në programin buxhetor të Ministrisë, “mbështetja e luftimit”.
Pavarësisht aktit që i shkon në ndihmë të përmbyturve, shtrohet pyetja se ku kanë shkuar fondet e rezervës apo kontigjencës në buxhet, të cilat në raste të ngjashme alokohen në të mirë të të dëmtuarve.
Vendimi i qeverise:
1. Në buxhetin e miratuar për vitin 2018 bëhet rishpërndarja e fondeve, si më poshtë vijon: a) Ministrisë së Bujqësisë dhe Zhvillimit Rural, në programin buxhetor 04250 “Zhvillimi rural duke mbështetur prodhimin bujqësor e blegtoral, agroindustrinë dhe marketingun”, artikulli 606, “Transfertë në buxhetet familjare”), zëri “Shpenzime korente”, i pakësohet fondi prej 20 000 000 (njëzet milionë) lekësh. b) Ministrisë së Mbrojtjes, në programin buxhetor 02150 “Mbështetja e luftimit”, i shtohet fondi i përmendur në shkronjën “a”, të kësaj pike, për t’u përdorur për sigurimin e bazës ushqimore për blegtorinë në zonat e përmbytura në Shkodër. 2. Ngarkohen Ministria e Bujqësisë dhe Zhvillimit Rural, Ministria e Mbrojtjes dhe Ministria e Financave dhe Ekonomisë për zbatimin e këtij vendimi.