Kreu i PD-së Lulzim Basha ka përshëndetur arritjen e marrëveshjes mes Malit të Zi dhe Kosovës për çështjen e mbetur pezull, atë të Demarkacionit.
Përmes një statusi në profilin e tij në ‘Facebook’, Basha shkruan se në këtë përvjetor të pavarësisë së Kosovës, nuk mund të kishte lajm më të mirë.
“Përshëndes arritjen e marrëveshjes mes presidentit të Kosovës dhe atij të Malit të Zi. Në këtë përvjetor të dhjetë të pavarësisë ky është një lajm i mirë për Kosovën.
Marrëveshja është një akt i qartë i bashkërendimit të Kosovës me aleatët tanë euroatlantikë. Shpreh bindjen se votimi i saj në parlamentin e Kosovës meriton vlerësimin e duhur nga institucionet europiane dhe se do të shpejtojë hapat e Kosovës drejt integrimit europian.”, shkruan Basha.
Ishte presidenti i Kosovës, Hashim Thaçi, i cili në një konferencë për media ditën e sotme, zyrtarisht njoftoi për Marrëveshjen e arritur për demarkimin e kufirit me Malin e Zi.
Thaçi tha se bashkë me kryeministrin e Malit të Zi, Dushko Markoviq, kanë arritur Marrëveshje për përmbylljen e këtij kapitulli.
