Në konferencën për shtyp mes tij dhe eurokomisionerit Johanes Hahn, kryeministri Edi Rama ka zbuluar disa detaje në lidhje me bisedën që ka patur me zyrtarin e lartë të BE-së.
Rama është shprehur se ka folur për zgjedhjet me Hahn, si një moment i cili është kapërcyer me sukses, por edhe për vullnetin e tij për të vijuar bashkëpunimin mes qeverisë dhe opozitës, një element për të cilin prej muajsh flitet në qarqet politike të vendit.
“Folëm për zgjedhjet si një moment i rëndësishëm i kapërcyer me sukses. Për vullnetin që të vazhdojë ajo që u nis si një qasje e re dhe vullnet bashkëpunimi mes qeverise dhe opozitës, e njoha komisionerin me planin e këtij mandati në funksion të reformave, të një transformimi rrënjësor të shërbimeve për publikun si një aspekt i luftës kundër korrupsionit dhe rryshfetit.” tha Rama.
Kjo është hera e dytë kur Rama shprehet hapur dhe jep sinjale të qarta për dëshirën e tij për të bashkëpunuar me opozitën.
